بانی پی ٹی آئی کو اسلام آباد پولیس پر حملے کے کیس میں سمن جاری

کینٹ کچہری لاہور نے بانی پی ٹی آئی کی رہائش گاہ کے باہر اسلام آباد پولیس پر حملے کے کیس میں عمران خان کو سمن جاری کر دیے

کینٹ کچہری لاہور میں بانی پی ٹی آئی کی رہائش گاہ کے باہر اسلام آباد پولیس پر مبینہ حملے سے متعلق مقدمے کی سماعت ہوئی۔

جوڈیشل مجسٹریٹ سہیل رفیق نے مقدمے کی کارروائی پر تحریری فیصلہ جاری کیا، جس میں کہا گیا کہ سینیٹر شبلی فراز بلانے کے باوجود پیش نہیں ہوئے۔

عدالت نے ان کی عدم پیشی پر مقدمے میں نامزد بانی پی ٹی آئی سینیٹر شبلی فراز کے ناقابل ضمانت وارنٹ جاری کر دیے، اور بانی پی ٹی آئی عمران خان کو طلبی کے سمن جیل روبکار کے ذریعے بھیج دیے۔

کیس کی مزید سماعت 30 جولائی تک ملتوی کر دی گئی۔

یاد رہے کہ دو سال قبل تھانہ ریس کورس پولیس نے بانی پی ٹی آئی کی رہائش گاہ زمان پارک کے باہر اسلام آباد پولیس پر حملے کا مقدمہ درج کیا تھا۔