بابوسرٹاپ:کلاؤڈ برسٹ میں جاں بحق افراد کی تعداد 9 ہوگئی، 10 سے 12 افراد تاحال لاپتہ

بابو سرٹاپ : گلگت بلتستان کے سیاحتی مقام بابو سر ٹاپ میں کلاؤڈ برسٹ کے نتیجے میں جاں بحق ہونے والے افراد کی تعداد 9 ہوگئی،جبکہ  دس سے بارہ افراد تاحال لاپتہ ہیں۔

 ترجمان گلگت بلتستان حکومت فیض اللہ فراق کے مطابق ابھی تک 300 افراد کو ریسکیو کیا گیا ہے، بہاؤ میں اضافے کی وجہ سے ریسکیو آپریشن میں مشکلات کا سامنا ہے۔ 

ترجمان فیض اللہ فراق نے مزید کہا کہ سیلابی تباہ کاریوں کے نتیجے میں اب تک 9 افراد جاں بحق ہو چکے ہیں جن میں 2 خواتین اور 2 بچے بھی شامل ہیں، لاپتا افراد کی تعداد 10 سے 12 کے درمیان ہو سکتی ہے۔

ترجمان گلگت بلتستان کے مطابق سیلاب کے شدید اثرات سے 500 سے زائد گھر تباہ ہو گئے ہیں اور مجموعی طور پر 12 کلومیٹر سے زائد سڑکیں نقصان پہنچا ہے،ساتھ ہی صوبے میں 27 پل اور 22 گاڑیاں سیلابی ریلوں کی نذر ہو گئی ہیں اور مالی و جانی نقصانات ضلع دیامر میں سب سے زیادہ ہوئے ہیں۔

انہوں نے مزید بتایا سیلابی تباہ کاریوں کے باعث درجنوں افراد زخمی بھی ہوئے ہیں جبکہ 300 سے زائد پھنسے ہوئے مسافروں اور سیاحوں کو ریسکیو کیا جا چکا ہے۔

 پاک فوج نے ریسکیو اور سرچ آپریشن میں بھرپور حصہ لیا ہے۔ تاہم پانی کے بڑھتے بہاؤ کی وجہ سے سرچ آپریشن میں مشکلات کا سامنا ہے اور لاپتا افراد کی تلاش جاری ہے تاکہ مزید جانی نقصان سے بچا جا سکے۔

دوسری جانب گلگت بلتستان میں پھنسے سیاحوں اور مقامی افراد کو شدید مشکلات کے باوجود پاک فضائیہ نے کامیابی سے ریسکیو کر لیا ہے جس میں 25 جولائی کو خصوصی پرواز کے ذریعے 125 افراد کو محفوظ مقام پر منتقل کیا گیا، جن میں 82 شہری، 25 پاک فوج کے اہلکار اور 18 پاک فضائیہ کے اہلکار شامل تھے۔ 

یہ آپریشن اس وقت ممکن ہوا جب C-130 طیارہ صبح 7 بج کر 55 منٹ پر نور خان ایئر بیس سے روانہ ہو کر قادری پہنچا۔