غزہ میں امدادی مراکز جلد قائم کریں گے ، امریکی صدر

امریکی صدر ڈونلڈ ٹرمپ نے کہا ہے کہ غزہ میں غذائی قلت ایک ناقابل انکار حقیقت ہے اور اس کے حل کے لیے امدادی مراکز جلد قائم کیے جائیں گے۔ ساتھ ہی انہوں نے ایران کو خبردار کیا کہ اگر اس نے جوہری پروگرام دوبارہ شروع کیا تو اسے فوری طور پر ختم کر دیا جائے گا۔

اسکاٹ لینڈ میں برطانوی وزیراعظم کیئراسٹارمر کے ہمراہ میڈیا سے گفتگو کرتے ہوئے ٹرمپ نے بتایا کہ برطانوی وزیراعظم سے غزہ کے مسئلے پر تبادلہ خیال ہوا ہے، تاہم حماس کے ساتھ مذاکرات اور جنگ بندی کے حوالے سے مشکلات درپیش ہیں۔

انہوں نے کہا کہ غزہ کے حالات کئی دہائیوں سے خراب ہیں اور اس علاقے میں غذائی قلت کا مسئلہ سنجیدہ ہے۔ امریکا نے غزہ میں خوراک کے لیے 60 ملین ڈالر فراہم کیے ہیں اور امید ہے کہ یہ امداد ضرورت مندوں تک پہنچ جائے گی۔

ٹرمپ نے مزید کہا کہ غزہ میں انسانی ضروریات کا خیال رکھنا ضروری ہے اور امداد کی فراہمی میں اسرائیل کی ذمہ داری اہم ہے۔ انہوں نے نیتن یاہو سے بات چیت جاری رکھنے اور متعدد منصوبے بنانے کا بھی ذکر کیا۔

ایران کے بارے میں ٹرمپ نے کہا کہ اگر ایران نے جوہری پروگرام شروع کیا تو اسے فوری طور پر روک دیا جائے گا کیونکہ ایران کی جانب سے مثبت اشارے نہیں مل رہے۔

پاک بھارت کشیدگی کے حوالے سے انہوں نے کہا کہ امریکہ نے پاکستان اور بھارت کے درمیان جنگ کو روکنے میں کردار ادا کیا ہے۔

دریں اثنا برطانوی وزیراعظم کیئراسٹارمر نے کہا کہ غزہ میں بھوک سے پریشان بچوں کے مناظر دل دہلا دینے والے ہیں اور امدادی ٹرکوں کو فوری طور پر داخلے کی اجازت دی جانی چاہیے۔ انہوں نے غزہ میں جنگ بندی کے لیے سنجیدہ کوششوں کا اعادہ کیا اور کہا کہ حماس کا مستقبل کی حکومت میں کوئی کردار نہیں ہوگا۔