الیکشن کمیشن نے سینیٹر اعجاز چوہدری، احمد چٹھہ اور احمد بھچر کو نااہل قرار دے دیا

الیکشن کمیشن آف پاکستان نے پاکستان تحریک انصاف (پی ٹی آئی) کے تین اہم رہنماؤں کو نااہل قرار دیتے ہوئے ان کی رکنیت ختم کرنے کے نوٹیفکیشنز جاری کر دیے ہیں۔

نوٹیفکیشن کے مطابق سینیٹر اعجاز چوہدری، قومی اسمبلی کے رکن محمد احمد چٹھہ اور پنجاب اسمبلی میں اپوزیشن لیڈر احمد خان بھچر کو انسداد دہشت گردی عدالت کی جانب سے 10 سال قید کی سزا سنائے جانے کے بعد نااہل قرار دیا گیا ہے۔

الیکشن کمیشن کا کہنا ہے کہ سینیٹر اعجاز چوہدری اب آئین کے آرٹیکل 63(1)(h) کے تحت سینیٹ کا رکن رہنے کے اہل نہیں رہے۔

اسی طرح، الیکشن کمیشن نے ایم این اے احمد چٹھہ (حلقہ این اے 66 وزیرآباد) اور ایم پی اے احمد خان بھچر (حلقہ پی پی 87 میانوالی) کی بھی اسمبلی رکنیت ختم کرنے کا اعلان کیا ہے۔

یاد رہے کہ تینوں رہنماؤں کو انسداد دہشت گردی کی عدالت نے مختلف مقدمات میں مجرم قرار دے کر 10، 10 سال قید کی سزا سنائی تھی، جس کے بعد آئینی اور قانونی تقاضوں کے مطابق ان کی نااہلی کا نوٹیفکیشن جاری کر دیا گیا۔