آئرلینڈ ویمنز کی پاکستان پر 11 رنز سے فتح

ڈبلن میں کھیلے گئے پہلے ٹی20 انٹرنیشنل میچ میں میزبان آئرلینڈ نے پاکستان ویمنز کرکٹ ٹیم کو 11 رنز سے شکست دے کر تین میچوں کی سیریز میں 0-1 کی برتری حاصل کر لی۔

پاکستان نے ٹاس جیت کر پہلے فیلڈنگ کا فیصلہ کیا، جس پر آئرلینڈ ویمنز ٹیم نے 19.4 اوورز میں 142 رنز بنائے اور آل آؤٹ ہو گئی۔ آئرش بیٹر ایمی ہنٹر 37 رنز کے ساتھ نمایاں رہیں۔

پاکستان کی جانب سے کپتان فاطمہ ثنا نے شاندار باؤلنگ کرتے ہوئے 26 رنز کے عوض 4 وکٹیں حاصل کیں، جو ان کے ٹی20 انٹرنیشنل کیریئر کی بہترین باؤلنگ بھی ہے۔ اس کے علاوہ ڈیانا بیگ، سعدیہ اقبال، رامین شمیم اور نشرہ سندھو نے ایک، ایک وکٹ حاصل کی۔

ہدف کے تعاقب میں قومی ٹیم کی بیٹنگ لائن مشکلات کا شکار رہی۔ محض 54 رنز پر 5 کھلاڑی آؤٹ ہو چکی تھیں۔ منیبہ علی اور گل فیروزہ صرف 5،5 رنز بنا کر پویلین لوٹیں، جبکہ سدرہ امین 15، عالیہ ریاض 14، ایمان فاطمہ 4 اور کپتان فاطمہ ثنا بھی صرف 14 رنز ہی بنا سکیں۔

پاکستان کی جانب سے نتالیہ پرویز 29 اور رامین شمیم 27 رنز کے ساتھ نمایاں رہیں، مگر ٹیم مقررہ 20 اوورز میں 9 وکٹوں کے نقصان پر صرف 131 رنز بنا سکی۔

آئرش باؤلر اورلا پرینڈرگاسٹ نے 28 رنز دے کر 3 وکٹیں حاصل کیں اور پاکستان کی بیٹنگ لائن کو بریک کیا۔

سیریز کے باقی دونوں میچز 8 اور 10 اگست کو ڈبلن میں ہی کھیلے جائیں گے۔