اسرائیل کے وحشیانہ حملے جاری، 24 گھنٹوں میں قومی فٹبالر سلیمان سمیت 150 سے زائد فلسطینی شہید

غزہ پر اسرائیل کے وحشیانہ حملے جاری ہیں، 24 گھنٹوں میں مزید 150 سے زائد فلسطینی شہید ہوگئے جن میں فلسطین کے قومی فٹبالر سلیمان بھی شامل ہیں۔

قطری میڈیا کے مطابق ان شہداء میں امداد کے منتظر 90 فلسطینی بھی شامل ہیں، فلسطینی فٹبال ٹیم کا کھلاڑی سلیمان العبید بھی کھانا ملنے کی آس میں اسرائیلی فائرنگ سے شہید ہوا، سلیمان العبید فلسطینی فٹبال ٹیم کے سابق کپتان بھی تھے۔

اب تک اسرائیلی حملوں میں مختلف کھیلوں کے 662 کھلاڑی جان سے ہاتھ دھو بیٹھے ہیں۔

علاوہ ازیں اسرائیلی فوج نے امدادی ٹرکوں کو بمباری سے تباہ سڑکوں کی طرف موڑ دیا، امدادی ٹرک اُلٹنے سے 20 فلسطینی شہید ہوگئے، غذائی قلت سے اب تک 96 بچوں سمیت 193 فلسطینی زندگیاں ہار چکے ہیں۔

ورلڈ فوڈ پروگرام کا کہنا ہے کہ غزہ میں چند امدادی ٹرکوں کی نہیں انسانی امداد کے سیلاب کی ضرورت ہے، یورپی کمیشن کی نائب صدر نے غزہ پر مکمل اسرائیلی قبضے کے ارادے کو ناقابلِ قبول اور اشتعال انگیزی قرار دیدیا ہے۔