سہ ملکی ٹی ٹوئنٹی سیریز، پاکستانی اور افغان شائقین کے لیے اہم فیصلہ 

دبئی:متحدہ عرب امارات(یو اے ای) میں اگست اور ستمبر کے دوران شیڈول سہ فریقی سیریز کے حوالے سے پاکستان اور افغانستان کے تماشائیوں کے لیے اہم فیصلہ کیا گیا ہے۔

شارجہ کی انتظامیہ نے دونوں ممالک کے تماشائیوں کے لئے الگ الگ اسٹینڈ مختص کرنے کا فیصلہ کیا گیا ہے، انتظامیہ کی جانب سے یہ فیصلہ امن و امان کی صورتحال برقرار رکھنے کے لئے کیا گیاہے۔

سیکیورٹی پروٹوکول کے تحت دونوں ممالک کے تماشائیوں کیلئے کرکٹ اسٹیڈیم میں الگ الگ داخلی دروازے اور اسٹینڈ مختص کیے جائیں گے۔

منتظمین نے تصدیق کی ہے کہ ٹکٹوں کی فروخت قومیت کی بنیاد پر محدود کی جائے گی اور شائقین کو ٹورنامنٹ کے دوران مخصوص نشستوں والے علاقوں میں بٹھایا جائے گاتاکہ ماضی کی طرح کوئی ناخوشگوار واقعہ پیش نہ آ سکے۔

یاد رہے کہ ستمبر 2022 میں ایشیا کپ کے سپر فور مرحلے میں پاکستان کی افغانستان کے خلاف فتح کے بعد افغان شائقین کی جانب سے شارجہ اسٹیڈیم میں ہنگامہ آرائی اور توڑ پھوڑ دیکھنے میں آئی تھی، جس کی ویڈیوز سوشل میڈیا پر وائرل ہو گئی تھیں۔

 ان مناظر میں افغان تماشائیوں کو کرسیاں پھینکتے ہوئے دیکھا گیا تھا، جس سے اسٹیڈیم کا ماحول کشیدہ ہو گیا تھا۔

واضح رہے کہ سہ فریقی ٹورنامنٹ 29 اگست سے شروع ہو رہا ہے جس میں پاکستان، میزبان یو اے ای اور افغانستان کی ٹیم شامل ہے اور تمام میچز شارجہ اسٹیڈیم میں کھیلے جائیں گے۔