سبی میں ریلوے ٹریک پر دھماکہ، جعفر ایکسپریس معجزانہ طور پر محفوظ

سبی: صوبہ بلوچستان کے ضلع سبی میں ریلوے اسٹیشن کے قریب ٹریک پر دھماکا ہوا تاہم خوش قسمتی سے کوئی جانی نقصان نہیں ہوا۔

ریلوے حکام کے مطابق دھماکا اس وقت ہوا جب کوئٹہ سے پشاور جانے والی جعفر ایکسپریس سبی ریلوے اسٹیشن سے گزر چکی تھی۔ 

حکام نے بتایا کہ دھماکے کے باعث ٹرین یا مسافروں کو کوئی نقصان نہیں پہنچا، البتہ ریلوے ٹریک کو نقصان ضرور ہوا ہے،حکام نے مزید کہا کہ جعفر ایکسپریس کو سبی سے اپنے مقررہ وقت پر پشاور روانہ کر دیا گیا۔

ریلوے حکام نے فوری مرمتی کام شروع کروا دیا ہے تاکہ متاثرہ ٹریک کو جلد بحال کیا جا سکے۔

دوسری جانب دھماکے کے بعد سیکیورٹی اداروں نے علاقے کو گھیرے میں لے کر شواہد اکٹھے کرنا شروع کر دیے ہیں۔

یاد رہے کہ جعفر ایکسپریس کو ماضی میں بھی متعدد بار تخریب کاری کا نشانہ بنایا جا چکا ہے، جس کے باعث اس کی سیکیورٹی کو ہمیشہ خاص اہمیت دی جاتی ہے۔