محکمہ موسمیات نے بارشوں سے متعلق خطرناک پیشگوئی کر دی

محکمہ موسمیات کے مطابق مون سون کے سلسلہ کی بارشوں کا دوسرا سپیل اتوار کی رات پاکستان میں داخل ہو گا اور بدھ تک جاری رہے گا۔ پنجاب میں راولپنڈی، اٹک، چکوال، جہلم،گجرات، منڈی بہاؤالدین، سیالکوٹ، نارووال، گجرانوالہ،حافظ آباد،لاہور،شیخوپورہ، قصور،اوکاڑہ، فیصل آباد، جھنگ، ٹوبہ ٹیک سنگھ، سرگودھا، میانوالی، اور خوشاب شامل ہیں تیز ہواؤں کے ساتھ گرج چمک کے ساتھ طوفانی بارشوں کی لپیٹ میں رہیں گے جبکہ بھکر، لیہ، ڈی جی خان، راجن پور، ملتان، خانیوال، ساہیوال، بہاولنگر، بہاولپوراور رحیم یار خان میں بارشوں اور تیز ہواؤں کا یہ سلسلہ جمعرات تک  جاری رہے گا۔

موسلادھار بارشوں سے راولپنڈی، سیالکوٹ،نارووال اور ڈی جی خان کے پہاڑی علاقوں میں برساتی نالوں میں اچانک سیلاب کی کیفیت پیدا ہو سکتی ہے۔اس دوران راولپنڈی، لاہور، قصور اور فیصل آباد میں شہری سیلاب کے واضح امکانات ہیں۔

دریاؤں میں پانی کی مقدار میں اضافہ نزدیکی آبادیوں کی لیے خطرناک ہو سکتا ہے۔ تیز اور موسلادھار بارشوں سے مواصلات اور ٹرانسپورٹ کا نظام متاثر ہو گا۔ سیر سیاحت کی غرض سے سفر اختیار کرنے والے افراد اور عام شہری محتاط رہیں۔ غیر ضروری سفر سے پرہیز کریں۔ الیکٹرک آلات کے استعمال میں احتیاط برتیں۔ برقی تنصیبات  اور خستہ حال اور بوسیدہ عمارات سے مناسب فاصلہ رکھیں۔

حکومت پنجاب کی جانب سے تمام متعلقہ محکموں کو الرٹ جاری کی جا چکی ہے۔ امدادی کاروائیوں میں آسانی اور نقصانات کے امکان کو کم سے کم کرنے کے لیے پانی کے بڑے ذخیروں کے گرد ناجائز تجاوزات ہٹائی جا رہی ہیں۔ ایسے تمام مقامات کی نگرانی کی جا رہی ہے جہاں سیلاب کا خطرہ ہے۔

پنجاب ڈیزاسٹر مینجمنٹ اتھارٹی کے ضلعی دفاتر اور امدادی ٹیمیں ریسکیو 1122میں موصول ہونے والی اطلاعات موقع پر نقصانات کے تخمینوں اور امدادی سامان کی فراہمی کے لیے موجود ہیں۔ اس کے علاوہ اتھارٹی کا کنٹرول روم 24گھنٹے مانیٹرنگ کے فرائض سرانجام دے رہا ہے۔ رضاکاروں کی جانب سے معلومات کا سلسلہ بھی جاری ہے۔ شہری پریشان نا ہوں احتیاط برتیں۔