معرکۂ حق اور بنیانِ مرصوص سے جڑے انکشافات پر مبنی کتاب منظر عام پر آنے کو تیار

معرکۂ حق اور آپریشن بنیانِ مرصوص سے متعلق مستند معلومات اور حقائق پر مبنی کتاب "دی وار دیٹ چینجڈ ایوری تھنگ" کی رونمائی 11 اگست کو متوقع ہے، جس کی تفصیلات اب منظرِ عام پر آچکی ہیں۔

یہ کتاب معروف صحافی مرتضیٰ سولنگی اور بین الاقوامی اسکالر احمد حسن العربی کی مشترکہ کاوش ہے، جس میں بھارت کے خلاف حالیہ پاکستانی فوجی آپریشن کے پس منظر، پیش منظر اور اہم پہلوؤں کو مفصل انداز میں پیش کیا گیا ہے۔

کتاب میں پاکستان اور بھارت کے درمیان حالیہ کشیدگی کے دوران رونما ہونے والے اہم واقعات، بھارتی ریاستی دہشت گردی کے تاریخی تسلسل اور جنگی بیانیے کو غیر جانب دار شواہد کے ساتھ بیان کیا گیا ہے۔

"دی وار دیٹ چینجڈ ایوری تھنگ" میں یہ بھی وضاحت کی گئی ہے کہ "بنیانِ مرصوص" کا نام کس نے اور کس مقصد کے تحت تجویز کیا، اور اس آپریشن کے دوران کس طرح کے اسٹریٹیجک فیصلے کیے گئے۔

اس کے علاوہ کتاب میں پہلگام واقعے سے لے کر معرکۂ حق تک بھارتی پروپیگنڈے کا تجزیہ اور اندرونی فیصلہ سازی سے متعلق اہم انکشافات بھی شامل کیے گئے ہیں، جنہیں پہلی مرتبہ عوام کے سامنے پیش کیا جا رہا ہے۔