وزیراعظم شہباز شریف 31 اگست کو چین روانہ ہوں گے

وزیراعظم شہباز شریف 31 اگست کو چین کے دورے پر روانہ ہوں گے، جہاں وہ شنگھائی تعاون تنظیم (SCO) کے اجلاس میں شرکت کریں گے۔

یہ اہم کانفرنس پاکستان کے سفارتخانے اور اسپیشل انویسٹمنٹ فیسلیٹیشن کونسل (SIFC) کی مشترکہ میزبانی میں منعقد ہوگی، جس کا بنیادی مقصد چینی سرمایہ کاروں کو پاکستان میں سرمایہ کاری کے امکانات سے آگاہ کرنا ہے۔

حکومتِ پاکستان نے تمام صوبوں کو فوری طور پر ایسے منصوبے فراہم کرنے کی ہدایت دی ہے، جو چینی سرمایہ کاروں کے سامنے پیش کیے جا سکیں۔ ان منصوبوں میں متعلقہ شعبہ، دائرہ کار، متوقع سرمایہ کاری، اور دیگر ضروری تفصیلات شامل ہوں گی۔

وزیراعظم ان مجوزہ منصوبوں کا خود جائزہ لیں گے، جس کے لیے ایک خصوصی بریفنگ سیشن کا انعقاد کیا جائے گا۔ اس سیشن میں تمام چیف سیکرٹریز کو براہِ راست وزیراعظم کو تفصیلات فراہم کرنے کی ہدایت دی گئی ہے۔