مانچسٹر پولیس کی جانب سے کرکٹر حیدر علی کے خلاف مقدمے کی تفصیلات جاری

گریٹر مانچسٹر پولیس نے پاکستانی کرکٹر حیدر علی سے متعلق جاری کیس کی تفصیلات سامنے لاتے ہوئے بتایا ہے کہ 4 اگست کو جنسی زیادتی کی شکایت موصول ہوئی تھی، جب کہ یہ واقعہ مبینہ طور پر 23 جولائی کو مانچسٹر کی حدود میں پیش آیا۔

پولیس کے مطابق، اس کیس میں 24 سالہ ایک نوجوان کو گرفتار کیا گیا، جسے تحقیقات مکمل ہونے تک ضمانت پر رہا کر دیا گیا ہے۔

یاد رہے کہ گزشتہ روز یہ خبر منظر عام پر آئی تھی کہ پاکستانی کرکٹر حیدر علی کو خاتون کے ساتھ مبینہ زیادتی کے الزام میں مانچسٹر پولیس نے گرفتار کیا، تاہم بعد ازاں انہیں ضمانت مل گئی۔

پولیس نے حیدر علی کو دو ہفتے بعد دوبارہ تفتیش کے لیے طلب کر لیا ہے، اور اس دوران ان پر برطانیہ چھوڑنے پر پابندی عائد ہے۔

یہ واقعہ پاکستان شاہینز کرکٹ ٹیم کے حالیہ دورۂ انگلینڈ کے دوران پیش آیا۔ دوسری جانب، پاکستان کرکٹ بورڈ (پی سی بی) نے حیدر علی کو معطل کر دیا ہے۔

پی سی بی کے مطابق، قومی بلے باز حیدر علی مانچسٹر پولیس کے ایک کریمنل کیس میں شاملِ تفتیش ہیں، اسی بنا پر انہیں فوری طور پر معطل کیا گیا ہے۔