ژوب: سیکیورٹی فورسز کاکلیئرنس آپریشن ، بھارتی اسپانسرڈ فتنہ الخوارج کے مزید 14 دہشت گرد ہلاک

ژوب: سیکیورٹی فورسز نے بلوچستان کے ضلع ژوب میں لیئرنس آپریشن کے دوران فائرنگ کے تبادلے میں افغانستان سے پاکستان میں داخل اندازی کوشش کرنے والے مزید 14 بھارتی اسپانسرڈ فتنہ الخوارج کے دہشت گرد مارے گئے، دو روز میں ہلاک دہشت گردوں کی تعداد 47 ہوگئی۔

پاک فوج کے شعبہ تعلقات عامہ (آئی ایس پی آر) کے مطابق بھارتی اسپانسرڈ فتنہ الخوارج نے گزشتہ روز افغان سرحد سے بلوچستان کے ضلع ژوب کے علاقے سمبازہ میں درندازی کی کوشش کی،جس پر سیکیورٹی فورسز نے کامیاب کارروائی کرتے ہوئے 33 امن دشمنوں کو ٹھکانے لگادیا۔

فورسز کی جانب سے علاقے میں سرچ اینڈ کلیئرنس آپریشن آج دوسرے روز بھی جاری رہا، اس دوران فائرنگ کے تبادلے میں بھارتی اسپانسرڈ فتنہ الخواج کے مزید 14 دہشت گرد مارے گئے، دو روز میں ہلاک تخریب کاروں کی تعداد 47 تک پہنچ گئی۔

ترجمان آئی ایس پی آر کے مطابق ہلاک دہشت گردوں سے اسلحہ، گولہ بارود اور دھماکا خیز مواد کا بڑا ذخیرہ بھی برآمد ہوا ہے۔

ترجمان پاک فوج نے واضح کیا کہ پاکستان کی سیکیورٹی فورسز ملکی سرحدوں کے دفاع اور بھارتی سرپرستی میں جاری دہشتگردی کا مکمل خاتمہ کرنے کے لیے پرعزم اور پوری طرح تیار ہیں۔

ترجمان کا کہنا ہے کہ پاک فوج ملک کی سرحدوں کے تحفظ، اور امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہے۔

دوسری جانب سیکیورٹی فورسز کی کامیاب کارروائی پر صدرمملکت، وزیراعظم اور وفاقی وزیر داخلہ سمیت سیاسی قیادت نے بہادر افواج کو خراج تحسین پیش کیااور واضح کیا کہ قومی حمایت کے ساتھ دہشتگردی کے ناسور کو جڑ سے ختم کیا جائے گا۔