سعودی عرب میں نماز کے اوقات میں دکانیں ،کاروباری مراکز کھلی رہیں گی

عرب میڈیا کے مطابق  سعودی  صنعت و تجارت کے سربراہ کی جانب سے جاری ایک سرکلر میں کہا گیا کہ مملکت میں تمام تجارتی مراکز اور کاروباری سرگرمیوں کو اوقات نماز کے دوران کھلے رہنے کی اجازت دی جائے گی۔

سعودی ارکان شوری نے وزارت اسلامی امور سے درخواست کی تھی  کہ وہ متعلہ ایجنسیوں سے مشاورت کریں کہ تجارتی سرگرمیوں بشمول پیٹرول پمپس اور فارمیسیز کو نماز کے اوقات میں بند نہ کیا جائے البتہ جمعے کی نماز میں تمام تجارتی سرگرمیوں پر پابندی برقرار رکھی جائے۔ ارکان کا کہنا  تھا  کہ ملک میں کام کرنے والی دیگر سرکاری و نجی کمپنیوں کی طرح شاپنگ سینٹرز اور دکانیں بھی لوگوں کے حصول معاش کا ذریعہ ہیں لہٰذا دیگر شعبوں کی طرح انہیں بھی بند نہیں کیا جانا چاہیے۔  کورونا وائرس کے خلاف احتیاطی تدابیر کے مطابق اور خریداروں کی صحت کو مدنظر رکھتے ہوئے   ، اجتماعات اور طویل انتظار سے بچنے کیلئے بھی تجارتی سرگرمیوں کے مالکان نے مطالبہ کیا تھا۔

 اس اقدام کا مقصد متعلقہ حکام کے ساتھ تعاون سے  خریداری کے تجربے کو بہتر بنانا ہے۔ مملکت نے تجارتی  مالکان  پر بھی زور دیا کہ وہ کام کو منظم کرنے ، خدمات  کی فراہمی   اور کارکنوں کی آمدورفت  کو اس طرح  سنبھالیں  کہ ان کے ساتھ ساتھ صارفین کو بھی نماز پڑھنے سے روکا نہ  جائے ۔

یاد رہے کہ سعودی ارکان شوری نے سفارش کی تھی کہ ’اوقات نماز کے دوران تجارتی ادارے بند کرنے کی پابندی اٹھالی جائے تاہم  مجلس شوری میں ان سفارشات پر ووٹنگ کو کچھ وجوہات کی بنا پر موخرکر دیا گیا تھا۔