عالمی ایجنسی موڈیز نے پاکستان کی ریٹنگ مزید بہتر کردی ،وزیر اعظم کا اظہارِ اطمینان

ویب ڈیسک : کریڈٹ ریٹنگ کی عالمی ایجنسی موڈیز نے پاکستان کی ریٹنگ مزید بہتر کردی ہے۔

عالمی ریٹنگ ایجنسی موڈیز کےمطابق پاکستان کا معاشی آؤٹ لک مستحکم ہے،پاکستان کی فارن ڈیبٹ ریٹنگ سی اےاےٹوسےسی اےاےون کردی گئی۔

پاکستان کی مقامی اور غیر ملکی کرنسی کی کریڈٹ ریٹنگ اس سے پہلے سی ڈبل اے ٹو تھی۔

موڈیز کا کہنا ہے کہ پاکستان کی ریٹنگ اپ گریڈ کرنے کی وجہ پاکستان کی بہتر بیرونی پوزیشن ہے، آئی ایم ایف پروگرام میں جاری ریفارمز بھی اپ گریڈ کا سبب ہیں۔

موڈیز کےمطابق ریٹنگ میں بہتری پاکستان کی ایکسٹرنل پوزیشن میں بہتری کوظاہرکرتی ہے،پاکستان کے فارن ریزرو میں مزید بہتری ممکن ہے،آئی ایم ایف پروگرام میں پاکستان نےمعاشی اصلاحات کیں۔

خیال رہے کہ اس سےقبل فچ اورایس اینڈپی بھی پاکستان کی ریٹنگ بہتر کر چکےہیں۔

دوسری جانب وزیرِ اعظم محمد شہباز شریف نے بین الاقوامی ادارے موڈیز کی جانب سے پاکستان کی کریڈٹ درجہ بندی میں بہتری پر اطمینان کا اظہار کرتے ہوئے معاشی ٹیم کی کوششوں کو سراہا ہے۔

وزیراعظم نے کہا کہ موڈیز کی جانب سے پاکستان کی کریڈٹ ریٹنگ CAA2 سے بہتر ہو کر CAA1 پر آنا انتہائی خوش آئند ہے۔ انہوں نے کہا کہ یہ بہتری حکومت کی معاشی پالیسیوں کی درست سمت کا مظہر ہے۔

محمد شہباز شریف نے یقین دلایا کہ حکومتی ٹیم اس ریٹنگ کو مزید بہتر کرنے کے لیے بھرپور محنت کر رہی ہے تاکہ پاکستان کی معیشت کو مستحکم اور مضبوط بنایا جا سکے-