پاکستانی کھلاڑیوں کی تائیکوانڈو میں تاریخ ساز کامیابی، مجموعی طور پر 16 تمغے جیت لیے

لاہور:صوبائی دارالحکومت لاہور میں منعقدہ ساتویں انٹرنیشنل تائیکوانڈو چیمپئن شپ میں پاکستانی کھلاڑیوں نے شاندار کارکردگی دکھاتے ہوئے مجموعی طور پر 16 تمغےجن میں12 سونے اور 4 چاندی کے جیت کر تاریخ رقم کر دی۔

چیمپئن شپ میں 18 ممالک سے تعلق رکھنے والے 1000 سے زائد کھلاڑیوں نے حصہ لیاتاہم پاکستانی کھلاڑیوں کی جیت سب کی توجہ کا مرکز بن گئی۔

پاکستان کے میاں غفران علی نے ایونٹ میں 2 گولڈ اور 2 سلور میڈلز جیت لئے، انہیں بہترین کوچ کا ایوارڈ بھی دیا گیا۔

اسی طرح فیصل آباد کے حافظ ناصر بشیر نے 90 کلو فائٹ میں گولڈ میڈل جیتا، لاہور کے نبیل خالد نے 2 گولڈ اور 1 سلور میڈل اپنے نام کیا، شاہروز ارشد نے 80 پلس کلو فائٹ میں گولڈ میڈل جیتا۔

طیبہ اشرف نے 49 کلو گرام کیٹیگری میں شاندار کھیل پیش کر کے تین طلائی تمغے جیتے جبکہ سنبل فاطمہ نے دو طلائی اور ایک چاندی کا تمغہ  حاصل کر کے پاکستان کا پرچم بلند کیا۔  

طیبہ اشرف اور سنبل فاطمہ نے زبردست مہارت کا مظاہرہ کرتے ہوئے پانچ طلائی اور ایک چاندی کا تمغہ اپنے نام کیا۔

 ان کی اس شاندار جیت کو نہ صرف تائیکوانڈوکے حلقوں میں سراہا جا رہا ہے بلکہ یہ کامیابی نوجوان خواتین ایتھلیٹس کے لیے بھی ایک روشن مثال قرار دی جا رہی ہے۔