بانی پی ٹی آئی بشریٰ بی بی کی ہدایت پر جیل میں حکیمی ادویات بھی استعمال کرنے لگے

راولپنڈی: اڈیالہ جیل راولپنڈی میں قید پاکستان تحریک انصاف ( پی ٹی آئی ) کے بانی چئیرمین عمران خان اہلیہ بشری بی بی کی ہدایات پر دیسی نسخے (حکیمی ادویات ) بھی استعمال کرنے لگ گئے۔

جیل ذرائع کے مطابق منگل کو سینٹرل جیل راولپنڈی میں سابق وزیراعظم عمران خان نے چیک اپ کرنے والی پمز کی میڈیکل ٹیم کو آگاہ کیا کہ دو روز پہلے ان کے پیٹ میں درد ہوا اور کچھ روز سے انہیں قبض کی بھی شکایت تھی،جس پر انہوں نے اپنی اہلیہ بشریٰ بی بی کے مشورے پر "قرصِ ملین" نامی دیسی دوا استعمال کی، جس سے انہیں نمایاں افاقہ ہوا۔ 

ذرائع کا بتانا ہے کہ عمران خان  خود کو فٹ رکھنے اور اسٹمنا بڑھانے کے لیے ایک ہربل میڈیسن  GINKO BILOBA  بھی استعمال کر رہے ہیں۔

اس حوالے سے بانی پی ٹی آئی کا کہنا تھا کہ ان کی اہلیہ بشریٰ بی بی دیسی ادویات کے بارے میں ان کی رہنمائی کرتی رہتی ہیں جو خاصی مفید ہوتی ہیں۔

دوسری جانب پمز میڈیکل ٹیم نے بانی پی ٹی آئی کے معائنے کے بعد ان کی عمومی صحت کو تسلی بخش قرار دیا، تاہم معمول کے طبی معائنے جاری رکھنے کی سفارش کی۔ 

دوران ملاقات بانی پی ٹی آئی نے یہ بھی کہا کہ قید کی مشکلات کے باوجود وہ اپنی صحت کو بہتر رکھنے کے لیے بھرپور کوشش کر رہے ہیں۔