جشنِ معرکۂ حق: اسٹیٹ بینک کا 75 روپے کا یادگاری سکّہ جاری

اسٹیٹ بینک آف پاکستان نے جشنِ معرکۂ حق اور یومِ آزادی کے موقع پر 75 روپے مالیت کا یادگاری سکّہ جاری کر دیا ہے۔
یہ سکّہ وفاقی حکومت کی منظوری سے مسلح افواج کی جرأت اور قربانیوں کو خراجِ تحسین پیش کرنے کے لیے جاری کیا گیا ہے۔

اس سکّے کا وزن 13.5 گرام اور قطر 30 ملی میٹر ہے۔ اس کی تیاری میں 79 فیصد تانبہ، 20 فیصد زنک اور ایک فیصد نکل استعمال کیا گیا ہے۔

سکّے کے اگلے رخ پر وسط میں ابھرتا ہوا ہلال اور پانچ نوکوں والا ستارہ موجود ہے، جس کا رخ شمال مغرب کی سمت ہے۔
ستارے اور ہلال کے اوپر کنارے کے ساتھ ساتھ اردو میں "اسلامی جمہوریہ پاکستان" کندہ ہے۔
چاند کے نیچے اور دو خمیدہ گندم کی بالیوں کے اوپر "2025" کا سال عددی صورت میں درج ہے۔
ستارے اور ہلال کے دائیں جانب "75" اور بائیں جانب اردو رسم الخط میں "روپیہ" تحریر ہے۔

سکّے کے پچھلے رخ کے وسط میں اردو میں "معرکۂ حق" اور نیچے عددی صورت میں "2025" درج ہے۔
بالائی کنارے پر اردو میں "پاکستان ہمیشہ زندہ باد" کے الفاظ رقم ہیں۔
سکّے کے دائیں اور بائیں اطراف میں دو لڑاکا طیارے، ایک بحری جہاز اور ملٹی پل راکٹ لانچر سسٹم ابھار کی شکل میں نمایاں ہیں، جو قومی دفاعی صلاحیت کی عکاسی کرتے ہیں۔

یہ یادگاری سکّہ 15 اگست 2025 سے اسٹیٹ بینک آف پاکستان کی بینکنگ سروسز کارپوریشن کے تمام فیلڈ دفاتر میں ایکسچینج کاؤنٹرز پر دستیاب ہوگا۔