وزیراعظم کی خیبرپختونخوا کو فوری امداد کی ہدایت، سیلابی تباہی پر ہنگامی اجلاس

وزیراعظم شہباز شریف نے حالیہ بارشوں اور سیلابی صورتحال کے پیش نظر خیبر پختونخوا کو ترجیحی بنیادوں پر امدادی سامان ٹرکوں کے ذریعے فوری بھیجنے کی ہدایت جاری کر دی ہے۔

وزیراعظم کی زیر صدارت ملک میں جاری شدید بارشوں اور سیلاب کی صورتحال کا جائزہ لینے کے لیے ایک ہنگامی اجلاس منعقد ہوا، جس میں نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین نے تفصیلی بریفنگ دی۔

چیئرمین این ڈی ایم اے نے وزیراعظم کو بالائی علاقوں میں کلاؤڈ برسٹ اور فلیش فلڈنگ کے نتیجے میں ہونے والے جانی و مالی نقصانات، ریسکیو اور ریلیف آپریشنز سے آگاہ کیا۔

وزیراعظم نے این ڈی ایم اے کو ہدایت کی کہ وہ خیبرپختونخوا حکومت اور پی ڈی ایم اے کے ساتھ قریبی رابطے میں رہ کر امدادی کارروائیاں جاری رکھیں۔ انہوں نے کہا کہ متاثرہ علاقوں میں ریسکیو اور ریلیف آپریشن کے لیے تمام وسائل بروئے کار لائے جائیں۔

وزیراعظم نے چیئرمین این ڈی ایم اے کو خیبرپختونخوا حکومت سے امدادی سرگرمیوں میں رابطے کو مربوط کرنے اور تیزی سے امدادی سامان کی ترسیل یقینی بنانے کی ہدایت بھی کی۔

انہوں نے مزید کہا کہ خیبرپختونخوا کو خیمے، ادویات، اشیائے خورونوش اور دیگر ضروری امدادی سامان ترجیحی بنیادوں پر ٹرکوں کے ذریعے روانہ کیا جائے، تاکہ متاثرین کو فوری سہولت فراہم کی جا سکے۔

وزیراعظم نے حکام کو یہ بھی ہدایت کی کہ سیلاب میں پھنسے ہوئے مقامی افراد اور سیاحوں کو فوری طور پر محفوظ مقامات پر منتقل کیا جائے۔