چین میں پاک بحریہ کی تیسری ہنگورکلاس آبدوز کی لانچنگ تقریب کا انعقاد

چین کے شہر ووہان میں پاک بحریہ کی تیسری ہنگور کلاس آبدوز "پی این ایس ایم مانگرو" (PNS-M MANGRO) کی لانچنگ تقریب منعقد ہوئی۔ یہ تقریب ووچانگ شپ بلڈنگ انڈسٹری گروپ کمپنی لمیٹڈ کے شوانگلیو بیس میں منعقد کی گئی، جہاں ڈپٹی چیف آف نیول اسٹاف (پراجیکٹ-2) وائس ایڈمرل عبدالصمد مہمان خصوصی کے طور پر شریک ہوئے۔

تقریب سے خطاب کرتے ہوئے وائس ایڈمرل عبدالصمد نے موجودہ جیو اسٹریٹیجک حالات کے تناظر میں میرٹائم سیکیورٹی کی اہمیت پر زور دیا۔ انہوں نے اس عزم کا اعادہ کیا کہ پاکستان نیوی ایک محفوظ اور مستحکم سمندری ماحول کو یقینی بنانے اور قومی مفادات کے تحفظ کے لیے پرعزم ہے۔

وائس ایڈمرل نے کہا کہ ہنگور کلاس آبدوزیں جدید ہتھیاروں اور سینسرز سے لیس ہیں، جو نہ صرف پاکستان کی دفاعی صلاحیت کو مضبوط کریں گی بلکہ خطے میں طاقت کے توازن اور امن و استحکام کو برقرار رکھنے میں بھی کلیدی کردار ادا کریں گی۔

انہوں نے چائنا شپ بلڈنگ اینڈ آف شور انٹرنیشنل کمپنی لمیٹڈ (CSOC) کی محنت اور پیشہ ورانہ کاوشوں کو سراہتے ہوئے منصوبے کی بروقت پیش رفت پر اطمینان کا اظہار کیا۔ انہوں نے کہا کہ یہ منصوبہ پاک چین دیرینہ اور اسٹریٹجک شراکت داری میں ایک نئی جہت کا اضافہ کرے گا۔

یاد رہے کہ حکومتِ پاکستان نے CSOC کے ساتھ آٹھ ہنگور کلاس آبدوزوں کی خریداری کا معاہدہ کیا ہے۔ اس معاہدے کے تحت چار آبدوزیں چین میں تعمیر کی جا رہی ہیں ، جبکہ چار آبدوزیں پاکستان میں کراچی شپ یارڈ اینڈ انجینئرنگ ورکس (KS&EW) میں ٹرانسفر آف ٹیکنالوجی (ToT) کے تحت تیار کی جائیں گی۔

تقریب میں پاکستان اور چین کے اعلیٰ حکام نے شرکت کی، جن میں ووچانگ شپ بلڈنگ انڈسٹری گروپ اور CSOC کے نمائندگان بھی شامل تھے۔