اٹلانٹک میں خطرناک پیش رفت: طوفان "ایرن" کیٹیگری 5 میں تبدیل ہونے کے قریب

امریکی نیشنل ہریکین سینٹر (NHC) نے خبردار کیا ہے کہ طوفان "ایرن" جلد کیٹیگری 5 کی شدت اختیار کر سکتا ہے، جو کہ 2025 کے اٹلانٹک ہریکین سیزن کا اب تک کا سب سے طاقتور طوفان بننے جا رہا ہے۔

خبر رساں ادارے رائٹرز کے مطابق این ایچ سی نے جمعے کو جاری کردہ تازہ رپورٹ میں بتایا کہ طوفان "ایرن" آج 16 اگست کی دوپہر کے بعد مزید شدت اختیار کر سکتا ہے، اور اس کے ہواؤں کی رفتار 250 کلومیٹر فی گھنٹہ تک پہنچ چکی ہے۔

موجودہ پوزیشن اور ممکنہ اثرات

ایرن اس وقت سان جوآن، پورٹو ریکو سے تقریباً 375 کلومیٹر مشرق-شمال مشرق میں موجود ہے۔ اس کی شدت اور دائرہ اثر میں تیزی سے اضافہ ہو رہا ہے۔

ماہرین کے مطابق ایرن سے پیدا ہونے والی سمندری لہریں اس ہفتے شمالی لیوارڈ جزائر، ورجن جزائر، پورٹو ریکو، ہسپانیولا اور ترکس و کیکوس جزائر کو متاثر کریں گی، جبکہ آئندہ ہفتے کے آغاز میں ان کا دائرہ اثر بہاماس، برمودا اور امریکی مشرقی ساحل تک پھیلنے کا امکان ہے۔

شدید بارشوں کا خدشہ

این ایچ سی کا کہنا ہے کہ طوفان کے زیر اثر اتوار تک شمالی لیوارڈ جزائر، ورجن جزائر اور پورٹو ریکو میں شدید بارشوں کی توقع ہے، جس سے سیلاب اور زمینی کٹاؤ جیسے خطرات پیدا ہو سکتے ہیں۔

ادارے نے متاثرہ علاقوں میں مقیم لوگوں کو حفاظتی اقدامات اختیار کرنے اور مقامی حکام کی ہدایات پر عمل کرنے کی ہدایت کی ہے۔