عدالتی مداخلت پر جج کو 24 گھنٹوں میں شکایت کا پابند بنانے کا فیصلہ

چیف جسٹس یحییٰ آفریدی کی زیر صدارت نیشنل جوڈیشل پالیسی ساز کمیٹی کا اہم اجلاس منعقد ہوا، جس میں تمام ہائی کورٹس کے چیف جسٹس صاحبان اور اٹارنی جنرل نے شرکت کی۔ اجلاس میں انصاف کی مؤثر فراہمی اور عدالتی نظام کو بہتر بنانے سے متعلق کئی اہم فیصلے کیے گئے۔

اجلاس میں عدالتی امور میں بیرونی مداخلت سے متعلق ایس او پیز کی منظوری دی گئی۔ فیصلہ کیا گیا کہ اگر کسی جج کو اپنے عدالتی امور میں بیرونی دباؤ یا مداخلت کا سامنا ہو تو وہ 24 گھنٹے کے اندر متعلقہ فورم پر شکایت درج کرے گا۔
ایسی شکایت پر 14 دن کے اندر فیصلہ کیا جائے گا، اور شکایت کنندہ جج کے وقار کا مکمل خیال رکھا جائے گا۔

اجلاس میں کمرشل مقدمہ بازی کی حوصلہ شکنی کے لیے جسٹس شفیع صدیقی کی سربراہی میں ایک کمیٹی تشکیل دی گئی ہے۔

مزید برآں، مختلف نوعیت کے مقدمات کے جلد فیصلے کے لیے ٹائم لائنز مقرر کر دی گئیں:

• کرایہ داری اور عائلی مقدمات: 6 ماہ میں نمٹائے جائیں

• قتل کے مقدمات: زیادہ سے زیادہ 2 سال

• جائیداد و وراثت کے کیسز: 12 ماہ

• جبری گمشدگی کے کیسز: زیر حراست شخص کو 24 گھنٹے میں عدالت میں پیش کرنا لازم ہوگا

اجلاس میں سندھ اور پشاور ہائی کورٹس کی ماڈل کریمنل ٹرائل کورٹس کی کارکردگی کو سراہا گیا۔

اجلاس میں یہ بھی طے پایا کہ ڈسٹرکٹ جوڈیشری پالیسی فورم قائم کیا جائے گا، اور جج صاحبان کی فلاح و بہبود کے لیے سفارشات تیار کی جائیں گی۔

اعلامیے کے مطابق ہائی کورٹس اور ڈسٹرکٹ کورٹس میں معلومات اور شکایات کے ازالے کے لیے فورمز قائم کرنے کی ہدایت کی گئی، جبکہ اسپیشل کورٹس و ٹریبونلز میں تعینات ججز کی واپسی میں تاخیر کا معاملہ حل کرنے کی یقین دہانی کرائی گئی۔

نیشنل جوڈیشل پالیسی ساز کمیٹی کا اگلا اجلاس 17 اکتوبر 2025 کو منعقد ہوگا۔