ملک سے پولیو کاخاتمہ کرکے بچوں کا مستقبل محفوظ بنائیں گے، وزیراعظم شہباز شریف

وزیراعظم شہباز شریف نے کہا ہے کہ پاکستان سے پولیو کا خاتمہ کرکے بچوں کا مستقبل محفوظ بنائیں گے۔

تفصیلات کےمطابق وزیر اعظم سے روٹری انٹرنیشنل فاؤنڈیشن کے صدر نے وفد کے ہمراہ ملاقات کی، اس موقع پر وفاقی وزیرِ صحت سید مصطفیٰ کمال، وزیراعظم کی انسداد پولیو کیلئے نمائندہ خصوصی عائشہ رضا فاروق اور دیگر اعلیٰ حکام بھی موجود تھے۔

اس موقع پر وزیراعظم نے کہا کہ پاکستان میں انسداد پولیو کیلئے روٹری انٹرنیشنل فاؤنڈیشن اہم کردار ادا کر رہی ہے۔

دوران ملاقات گفتگو کرتے ہوئے وزیر اعظم نے کہا کہ پولیو مہمات میں پولیو ورکرز کا کلیدی کردار قابل تحسین ہے، ہم ملک سے پولیو کے مکمل خاتمے کیلئے پرعزم ہیں، پولیو کے خاتمے میں مشکلات ہیں مگر یہ نا ممکن نہیں۔

وفد نے حکومت پاکستان کے انسداد پولیو اقدامات کی تعریف کرتے ہوئے کہا کہ وزیراعظم کی خصوصی توجہ اور مؤثر قیادت کی بدولت ملک سے اس موذی مرض کا جلد خاتمہ ممکن ہوجائے گا۔

وزیر اعظم شہباز شریف نے کہا کہ محکمہ صحت، پولیو ورکرز اور متعلقہ ادارے پولیوکے خاتمے کیلئے پرعزم ہیں، انہوں نے کہا کہ پاکستان سے پولیو کا خاتمہ کرکے بچوں کا مستقبل محفوظ بنائیں گے۔

 اس موقع پر صدر روٹری انٹرنیشنل نے انسداد پولیو کے لیے اپنی معاونت جاری رکھنے کے عزم کا اعادہ کیا۔