کراچی میں شدید بارشیں ،صوبائی حکومت کاکل اسکول بند رکھنے کا اعلان

کراچی: شہر قائد میں ہونے والی موسلادھار بارش کے بعد اربن فلڈنگ کی صورتحال پیدا ہو گئی ہے جس سےشہر کے کئی علاقے زیر آب آ چکے ہیں،جبکہ بعض علاقوں میں پانی لوگوں کےگھروں میں داخل ہو چکا ہے۔ 

کراچی میں جاری شدید اربن فلڈنگ کے پیش نظر صوبائی حکومت کی جانب سے کل تمام سرکاری و نجی اسکولوں کو بند رکھنے کا فیصلہ کیا گیا ہے۔
اس حوالے سے صوبائی محکمہ تعلیم نے نوٹیفیکیشن جاری کر دیا ہے۔

دوسری جانب سینئر صوبائی وزیر شرجیل انعام میمن نے کہا کہ عوم کی جان اور حفاظت سب سے مقدم ہے، اسی لیے شہریوں کو چاہیے کہ وہ اپنی حفاظت کے لیے گھروں میں رہیں۔

انہوں نے کہا کہ صوبائی وزیر سعید غنی اور میئر کراچی مرتضیٰ وہاب کی قیادت میں ضلعی انتظامیہ، کے ایم سی، واٹر بورڈ اور ریسکیو ادارے پوری طرح متحرک ہیں۔

انہوں نے کہا کہ برساتی نالوں کی صفائی، رکاوٹوں کے خاتمے، مشینری کے ذریعے پانی نکالنے اور ایمرجنسی راستوں کو کھلا رکھنے کے لیے اقدامات جاری ہیں۔

شرجیل انعام میمن نے کہا کہ سندھ حکومت عوام کو ہرگز اکیلا نہیں چھوڑے گی اور شہریوں کو ہر ممکن سہولت فراہم کی جا رہی ہے۔