خیبرپختونخوا میں سیلاب متاثرین کے لیے ایک ہفتے تک لوڈشیڈنگ سے آزاد بجلی فراہم کریں ، وزیر اعظم

وزیراعظم شہباز شریف نے خیبرپختونخوا کے سیلاب سے متاثرہ علاقوں میں ایک ہفتے تک بغیر لوڈشیڈنگ مسلسل بجلی فراہمی کی ہدایت کی ہے۔

وزیراعظم کی زیرصدارت حالیہ بارشوں اور سیلاب کے نقصانات اور امدادی کارروائیوں پر اجلاس منعقد ہوا۔

اجلاس میں وزیراعظم نے خیبرپختونخوا کے متاثرہ علاقوں میں ایک ہفتے تک بغیر لوڈشیڈنگ مسلسل بجلی فراہمی کا حکم دیتے ہوئے کہا کہ متاثرین میں امدادی رقوم کی تقسیم کے لیے ضروری کارروائیاں فوری طور پر مکمل کی جائیں۔

انہوں نے مزید کہا کہ امدادی سامان پر مشتمل ٹرکوں کی تعداد کو فوراً دوگنا کیا جائے اور وزیر آبی وسائل معین وٹو آزاد کشمیر اور وزیر عوامی امور رانا مبشر صوابی میں امدادی کاموں کی نگرانی کریں۔

وزیراعظم نے کہا کہ وفاقی وزرا امیر مقام، عبدالعلیم خان، اویس خان لغاری اور سردار یوسف نے متاثرہ علاقوں کا دورہ کیا، اور متعلقہ وزرائے اعلیٰ، چیف سیکرٹریز، وفاقی سیکرٹریز، پاک فوج اور دیگر اداروں کا شکریہ ادا کیا۔ انہوں نے کہا کہ تمام اداروں نے فوری ہدایات کے بعد امداد اور بحالی کے لیے اقدامات کیے اور کر رہے ہیں۔