وزیر خارجہ اسحاق ڈار 2 روزہ سرکاری دورے پر ڈھاکہ پہنچ گئے

ڈھاکہ: نائب وزیراعظم وزیر خارجہ اسحاق ڈار بنگلہ دیش کے تاریخی دورے پر ڈھاکہ پہنچ گئے جہاں ان کا پاکستانی ہائی کمشنرعمران حیدر سمیت بنگلہ دیشی اعلی حکام نے استقبال کیا۔

یہ دورہ 13 سال بعد کسی بھی پاکستانی وزیر خارجہ کا پہلا دورۂ بنگلہ دیش ہے۔

ترجمان کے مطابق دورے کے دوران نائب وزیر اعظم و وزیر خارجہ کی بنگلا دیشی اعلیٰ قیادت سے اہم ملاقاتیں طے ہیں جن میں دونوں ممالک کے تعلقات کے تمام پہلوؤں پر تفصیلی بات چیت کی جائے گی۔

ترجمان دفتر خارجہ نے مزید بتایا کہ اسحاق ڈار بنگلا دیش کے چیف ایڈوائزر پروفیسر محمد یونس سے بھی ملاقات کریں گے جب کہ خارجہ امور کے ایڈوائزر محمد توحید حسین سے بھی ان کی نشست ہوگی۔ 

ترجمان کے مطابق ان ملاقاتوں میں دو طرفہ تعلقات کو مزید فروغ دینے کے اقدامات پر غور کے ساتھ ساتھ علاقائی اور عالمی امور پر بھی تبادلہ خیال کیا جائے گا۔

دفتر خارجہ کے مطابق یہ دورۂ پاکستان اور بنگلہ دیش تعلقات میں ایک اہم سنگ میل ہے،نائب وزیر اعظم و وزیر خارجہ کا دورہ بنگلہ دیشی حکومت کی دعوت پر ہو رہا ہے۔