بانی پی ٹی آئی کے بیٹوں کا والد کی رہائی کیلئے اقوام متحدہ سے رجوع 

ویب ڈیسک : پاکستان تحریک انصاف ( پی ٹی آئی) کے بانی چئیرمین اور سابق وزیر اعظم عمران خان کے بیٹوں نے والد کی رہائی کے لئے اقوام متحدہ سے رجوع کر لیا۔

تفصیلات کےمطابق بانی پی ٹی آئی کے صاحبزادوں نے والد کی رہائی کیلئے اقوام متحدہ سے رجوع کر لیا،  سلیمان اور قاسم خان نے اقوام متحدہ کے سپیشل نمائندہ برائے تشدد کے روبرو اپنے والد کے لئے اپیل دائر کر دی۔

اپیل میں انہوں نے اپنے والد سے روا سلوک کی فوری تحقیقات کا مطالبہ کیا ہے، اپیل میں کہا گیا کہ والد کی قید کو عالمی قوانین کے خلاف قرار دیا جا چکا ہے، والد کو قید تنہائی، ناقص خوراک، طبی سہولتوں سے محرومی اور مسلسل نگرانی کا سامنا ہے۔

عمران خان کے صاحبزادوں نے اپیل میں کہا کہ والد ایسی اذیت میں ہیں جو انسانی وقار کے منافی ہے، ایمنسٹی انٹرنیشنل اور امریکی محکمہ خارجہ نے  بانی پی ٹی آئی کی صحت اور حفاظت پر تشویش ظاہر کی، اقوام متحدہ کے نمائندے کو فوری مداخلت اور رہائی کے لیے اقدامات کرنے پر زور دیا گیا۔

 قاسم خان نے نے اپنے ٹویٹ میں کہا کہ میرے والد جمہوریت کیلئے کھڑے ہونے کی سزا کے طور پر جیل میں ہیں،والد کو تنہائی میں قید رکھا گیا ہے، والدکو ڈاکٹرز سے ملاقات اور قانونی مشاورت سے محروم رکھا گیا ہے، بانی پی ٹی آئی کے اہل خانہ اور ہزاروں حامی اغوا یا فوجی عدالتوں میں پیش کیے گئے‘‘۔

 بانی پی ٹی آئی  کے بیٹے نےٹویٹ میں مزید لکھا کہ ’’ یہ انصاف نہیں بلکہ سیاسی انتقام ہے،  پاکستان کی جمہوریت خطرے میں ہے، دنیا انسانی حقوق اور جمہوریت کے ساتھ کھڑی ہو۔