فلسطینی عوام کو حق خود ارادیت حاصل ہے اور پاکستان ان کے ساتھ کھڑا ہے،عاصم افتخار

نیویارک: اقوام متحدہ میں پاکستان کے مستقل مندوب سفیر عاصم افتخار احمد نے کہا ہے کہ فلسطینی عوام کو حق خود ارادیت حاصل ہے اور پاکستان ان کے ساتھ کھڑا ہے۔

تفصیلات کے مطابق اقوام متحدہ میں پاکستان کے مستقل مندوب عاصم افتخار احمد نے بتایا ہے کہ پاکستان نے فلسطین کے مسئلے کے پرامن حل اور دو ریاستی حل کے نفاذ سے متعلق “نیو یارک اعلامیہ” کے حق میں ووٹ دیا ہے۔ یہ اعلامیہ حال ہی میں نیویارک میں 28 تا 30 جولائی 2025 منعقدہ اعلیٰ سطحی بین الاقوامی کانفرنس کے نتیجے میں منظور کیا گیا۔

پاکستانی مندوب کے مطابق پاکستان اس بات پر یقین رکھتا ہے کہ فلسطینی عوام کو حق خود ارادیت حاصل ہے ، کہ وہ ایک آزاد، قابل عمل اور متصل فلسطینی ریاست قائم کریں جس کی سرحدیں 1967 سے پہلے کی بنیاد پر ہوں ، جس کا دارالحکومت القدس الشریف ہو، انہوں نے اپنی بات جاری رکھتے ہوئے یہ بھی بتایا کہ ہمارا یہ مطالبہ اقوام متحدہ کی قراردادوں اور بین الاقوامی قانون کے عین مطابق ہے۔

انہوں نے مزید کہا ہے کہ "نیو یارک اعلامیہ" کی توثیق اس حقیقت کی غمازی کرتی ہے کہ پاکستان ہمیشہ ایک منصفانہ اور پائیدار امن کے قیام کے لیے پرعزم رہا ہے۔

پاکستان نے غزہ میں جاری اسرائیلی جارحیت کی بھی شدید مذمت کی ہے جس کے نتیجے میں 64 ہزار سے زائد بے گناہ فلسطینی جاں بحق ہوچکے ہیں۔

 پاکستان نے عالمی برادری سے مطالبہ کیا ہے کہ فلسطینی عوام کے حق میں آواز بلند کی جائے اور خطے میں ایک منصفانہ امن کے لیے مؤثر اقدامات کیے جائیں۔