صحت کے شعبے میں انقلاب، اے آئی اور روبوٹ کی مدد سے پہلا پِتّے کا کامیاب آپریشن

سیان تیاگو:لاطینی امریکی ملک چلی کے دارالحکومت سینٹیاگو میں ڈاکٹروں نے پہلی بار اے آئی اور روبوٹ کی مدد سے پتّے کا آپریشن کامیابی سے مکمل کیا۔

غیر ملکی میڈیا رپورٹس کے مطابق اسپتال کلینیکا لاس کونڈیس میں کئے گئے اس آپریشن میں جدید سرجیکل سسٹم مارس (MARS)  پلیٹ فارم استعمال کیا گیا، جو روبوٹک بازوؤں اور مصنوعی ذہانت کے ملاپ سے بنایا گیا ہے.

رپورٹس کے مطابق یہ جدید سسٹم ایسا روبوٹک بازو فراہم کرتا ہے، جو آلات کو مریض کے جسم کے اندر مقناطیس کے ذریعے حرکت دیتا ہے، جبکہ دوسرا بازو ایک خودکار کیمرے سے لیس ہے، جو سرجن کے ہاتھ یا پاؤں کی حرکت پر کنٹرول ہوتا ہے۔

اس موقع رپر ہیڈ آف سرجری ڈاکٹر ریکارڈو فنکےکا کہنا تھا کہ یہ دنیا کا پہلا روبوٹ آپریشن ہے جس میں کسی مریض پر محفوظ اور آزمودہ مصنوعی ذہانت سے چلنے والی ٹیکنالوجی استعمال کی گئی ہے، یہ نہ صرف اعلیٰ معیار کا منظر فراہم کرتی ہے، بلکہ مستقبل میں سرجری کے طریقہ کار بدلنے کی صلاحیت بھی رکھتی ہے۔

خیال رہے کہ یہ ٹیکنالوجی لیویٹا میگنیٹکس نامی ایک چلیئن میڈیکل اسٹارٹ اپ کمپنی نے تیار کی ہے، جسے 2023 میں امریکی فوڈ اینڈ ڈرگ ایڈمنسٹریشن سے منظوری ملی، تاکہ اسے پیٹ کی سرجریوں میں استعمال کیا جا سکے۔

 تاہم جون میں اس کا دائرہ کار بڑھا کر بیریاٹرک اور ہرنیا سرجریز تک پھیلا دیا گیا، جو سب سے عام آپریشنز میں شمار ہوتے ہیں۔