غزہ پر اسرائیلی حملوں میں مزید 64 فلسطینی شہید، مجموعی تعداد 62 ہزار 686 تک پہنچ گئی

غزہ: اسرائیلی فوج کے تازہ حملوں میں آج صبح سے اب تک مزید 64 فلسطینی شہید ہو چکے ہیں، جن میں بچے اور امداد کے منتظر شہری بھی شامل ہیں۔ غزہ میں جاری اسرائیلی جارحیت کے باعث شہدا کی مجموعی تعداد بڑھ کر 62,686 ہو گئی ہے۔

قطری نشریاتی ادارے الجزیرہ کے مطابق، غزہ سٹی پر ممکنہ زمینی کارروائی کی تیاریوں کے ساتھ اسرائیلی حملوں میں مزید شدت آ چکی ہے۔
طبی ذرائع نے بتایا کہ جنوبی غزہ میں امداد کے متلاشی 5 فلسطینیوں کو اسرائیلی حملے میں نشانہ بنایا گیا، جو خوراک کے انتظار میں امریکی و اسرائیلی حمایت یافتہ GHF (گلوبل ہیومینیٹیرین فاؤنڈیشن) کے فوڈ ڈسٹری بیوشن پوائنٹس کے قریب موجود تھے۔

اس سے قبل مختلف اسپتالوں کے ذرائع نے تصدیق کی تھی کہ کم از کم سات امداد کے منتظر افراد اسرائیلی فائرنگ کا نشانہ بن چکے ہیں۔

غزہ کی وزارت صحت کے مطابق، اکتوبر 2023 سے اب تک جاری حملوں میں 157,951 فلسطینی زخمی ہو چکے ہیں۔

مزید برآں، مئی 2024 کے آخر میں GHF کے قیام کے بعد سے اب تک 2095 امداد کے متلاشی افراد شہید اور 15,431 زخمی ہو چکے ہیں، جو کہ اسرائیلی حملوں کا براہِ راست نشانہ بنے۔