سربراہ پاک فضائیہ سے ایتھوپیا کے ائیر کمانڈر کی ملاقات، عسکری تعاون کے فروغ کا عزم

اسلام آباد: پاک فضائیہ کے سربراہ ایئر چیف مارشل ظہیر احمد بابر سدھو سے ایتھوپیا کی فضائیہ کے کمانڈر لیفٹیننٹ جنرل یلمہ مرداسا نے ایئر ہیڈکوارٹرز اسلام آباد میں ملاقات کی۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران پیشہ ورانہ دلچسپی کے امور پر تفصیلی تبادلہ خیال اور دونوں فضائی افواج کے مابین تعاون کو مزید فروغ دینے کے عزم کا اعادہ کیا گیا۔

آئی ایس پی آر نے مزید بتایا کہ ایئر ہیڈکوارٹرز آمد پر پاک فضائیہ کے چاق چوبند دستے نے معزز مہمان کو گارڈ آف آنر پیش کیا۔

دوران ملاقات ایئر چیف مارشل ظہیر احمد بابر سدھو نے مشترکہ تربیتی پروگرامز کے ذریعے دونوں فضائی افواج کے درمیان عسکری شراکت داری کو مزید مستحکم بنانے کے عزم کا اظہار کیا۔

ترجمان پاک فوج کے مطابق دوران ملاقات ائیر چیف مارشل نے ایتھوپین فضائیہ کو پیشہ ورانہ میدان میں مکمل تعاون کی یقین دہانی کرواتے ہوئے کہا کہ پاکستان ایتھوپیا کے ساتھ دوستانہ تعلقات کو قدر کی نگاہ سے دیکھتا ہے اور تربیت، صلاحیت سازی اور آپریشنل شعبوں میں ہر ممکن معاونت فراہم کرنے کے لیے پرعزم ہے۔

آئی ایس پی آر کے مطابق اس موقع پر لیفٹیننٹ جنرل یلمہ مرداسا نے پاکستان آمد پر شاندار میزبانی پر شکریہ ادا کیا اور پاک فضائیہ کی آپریشنل تیاری، جدید ملٹی ڈومین صلاحیتوں اور مؤثر دفاعی حکمت عملی کو سراہا۔

انہوں نے مزید کہا کہ ایتھوپین فضائیہ، پاک فضائیہ کے جنگی تجربات، مربوط کمانڈ سسٹمز اور ٹیکنالوجی میں جدت سے سیکھ کر اپنی صلاحیتوں کو مزید بہتر بنانے کی خواہاں ہے۔

ترجمان کے مطابق دورے کے دوران معزز مہمان کو نیشنل آئی ایس آر اور انٹیگریٹڈ ایئر آپریشنز سینٹر اور پاک فضائیہ سائبر کمانڈ کا دورہ بھی کرایا گیا، جہاں انہوں نے پاک فضائیہ کی جدید ٹیکنالوجی اور جدید جنگی نظام میں مہارت کو سراہا۔