ایف بی آر کا کورئیرز اور ڈیجیٹل پلیٹ فارمز کو ریٹرن لازمی جمع کرانے کا حکم

ای کامرس پر نگرانی مؤثر بنانے کے لیے ایف بی آر نے کورئیرز اور ڈیجیٹل پلیٹ فارمز کو ریٹرن لازمی جمع کرانے کا پابند بنا دیا۔

فیڈرل بورڈ آف ریونیو (ایف بی آر) نے تعمیل کے پروٹوکول مزید سخت کرتے ہوئے کورئیرز اور ادائیگی کے درمیانی اداروں پر سہ ماہی ریٹرن جمع کرانے کی پابندی عائد کر دی ہے، جو ودہولڈنگ ٹیکس جمع یا کٹوتی کرنے کے ذمہ دار ہیں۔ ریونیو اتھارٹی نے انکم ٹیکس رولز 2002 میں ایس آر او 1634 آف 2025 کے ذریعے ڈرافٹ ترامیم جاری کی ہیں، یہ ڈرافٹ اسٹیک ہولڈرز کی رائے حاصل کرنے کے بعد حتمی شکل دی جائے گی۔

مجوزہ ترامیم کے تحت، سیکشن 165 کی ذیلی شق 2 اور سیکشن 165سی کی ذیلی شق 1 کے مطابق، کوئی بھی کورئیر یا ادائیگی کا درمیانی ادارہ جو آرڈیننس کے چیپٹر 10 کے پارٹ 5 کے ڈویژن 2 یا ڈویژن 3 یا چیپٹر 12 کے تحت ٹیکس جمع یا کٹوتی کرنے کا پابند ہے، اسے سہ ماہی اسٹیٹمنٹ جمع کرانی ہوگی۔ یہ اسٹیٹمنٹس برقی طور پر ان فارمیٹس میں جمع کرائی جائیں گی جو رولز کے سیکنڈ شیڈول کے پارٹ 10 میں تجویز کیے گئے ہیں۔

ریٹرن جمع کرانے کی آخری تاریخیں مقرر کی گئی ہیں، جو 20 اپریل (اختتام مارچ 31)، 20 جولائی (اختتام جون 30)، 20 اکتوبر (اختتام ستمبر 30) اور 20 جنوری (اختتام دسمبر 31) ہیں۔ سیکشن 165سی کی ذیلی شق 2 کے مطابق، ڈیجیٹل پلیٹ فارمز کو ماہانہ تفصیلی اسٹیٹمنٹس جمع کرانا ہوں گی جن میں رجسٹرڈ سیلرز کے لین دین اور مجموعی اعداد و شمار شامل ہوں گے۔

ڈیجیٹل کامرس کی نگرانی کو مزید مؤثر بنانے کے لیے ایک متوازی اقدام کے تحت ایف بی آر نے آن لائن مارکیٹ پلیسز پر ماہانہ رپورٹنگ کی پابندی بھی عائد کی ہے، جو ڈیجیٹل طور پر آرڈر کیے گئے سامان اور خدمات کو ہینڈل کرتی ہیں۔

مزید یہ کہ اگر کوئی آن لائن مارکیٹ پلیس کورئیر سروس فراہم کرتی ہے تو اسے رول 44 کے ذیلی قاعدہ 2 کے تحت بھی اسٹیٹمنٹس جمع کرانی ہوں گی، جو سیکنڈ شیڈول کے پارٹ 10 کے ساتھ منسلک ہیں۔

واضح رہے کہ مجوزہ پروٹوکول صرف ملکی ای کامرس اداروں اور کورئیرز پر لاگو ہوں گے۔