پنجاب کے سیلابی علاقوں میں پاک فوج کا ریسکیو اور ریلیف آپریشن جاری

پنجاب کے سیلابی علاقوں میں پاک فوج کا ریسکیو اور ریلیف آپریشن جاری ہے۔

پاک فوج سیلاب کی تباہ کاریوں کے خلاف فرنٹ لائن پر موجود ہے تاکہ شہریوں کی جان و مال کا تحفظ یقینی بنایا جا سکے۔

ترجمان کے مطابق سیالکوٹ، نارووال، گوجرانوالہ اور ہیڈ خانکی سمیت پنجاب کے مختلف سیلاب سے متاثرہ علاقوں میں پاک فوج کے جوان ریسکیو اور ریلیف سرگرمیوں میں بھرپور حصہ لے رہے ہیں۔

پاک فوج کی 6 ریسکیو  ٹیمیں دریائے ستلج اور  دریائے راوی پر ریلیف سرگرمیوں میں مصروف عمل ہیں۔ ہیڈ سلیمانکی اور اٹاری کے مقامات پر پاک فوج کی ٹیمیں کشتیوں کے ذریعے متاثرین کو محفوظ مقامات پر منتقل کر رہی ہیں

دوسری طرف قصور میں سیلاب سے متاثرہ علاقوں میں سول انتظامیہ کے ساتھ  پاک فوج کے دستے سیلاب متاثرین کو محفوظ مقامات تک پہنچا رہے ہیں۔ پاک فوج کے ساتھ دیگر محکمے پولیس، محکمہ آبپاشی، صحت، لائیو سٹاک، 1122 اور سول ڈیفنس بھی امدادی سرگرمیوں میں شریک ہیں۔

پاک فوج نے سول انتظامیہ کے ساتھ مل کرضلع قصور میں 21 ریسکیو اینڈ ریلیف کیمپس قائم کئے ہیں، اب تک قصور کے دیہاتوں سے لگ بھگ 18 ہزار افراد اور مال مویشی محفوظ مقامات پر منتقل کیے گئے ہیں۔

پاک فوج کا انتظامی کیمپ منڈی احمد آباد میں قائم، متاثرہ خاندانوں کو پناہ اور سہولیات فراہم کی جا رہی ہے، گنڈا سنگھ والا پر اونچے درجے کے سیلاب میں بھی پاک فوج متاثرہ عوام  کو ریلیف فراہم کرنے میں مصروف ہے۔ اوکاڑہ میں بھی پاک فوج کا ریسکیو اور ریلیف آپریشن تیزی سے جاری ہے

پاک فوج کے دستے ہیلی کاپٹروں اور کشتیوں کی مدد سے متاثرہ افراد کو محفوظ مقامات پر منتقل کر رہے ہیں، ریسکیو کئے جانے والے افراد میں بزرگ شہری، خواتین اور بچے بھی شامل ہیں، جنہیں فوری طور پر امدادی مراکز میں منتقل کیا جا رہا ہے۔