خواتین کے لباس سے متعلق نامناسب بیان دینے پر عظمیٰ بخاری نے غلطی تسلیم کر لی

لاہور: وزیراطلاعات پنجاب عظمیٰ بخاری نے خواتین کے لباس سے متعلق کیے گئے نامناسب تبصرے پر غلطی کا اعتراف کرلیا ہے۔

تفصیلات کے مطابق نجی ٹی وی پروگرام میں گفتگو کرتے ہوئے عظمی بخاری نے خواتین کےلباس کے متعلق نامناسب بیان پر غلطی کا اعتراف کرتے ہوئے کہا کہ وہ بھی ایک عورت ہیں اور سمجھ سکتی ہیں کہ خواتین کو لباس سے متعلق کس طرح کی مشکلات کا سامنا کرنا پڑتا ہے اور مجھے افسوس ہے کہ میرے منہ سے ایسی بات نکلی۔

صوبائی وزیر اطلاعات نے مزید کہا کہ مجھے بہت تکلیف ہے کہ یہ بیان میرے منہ سے نکلا لیکن یہ الفاظ میرے منہ سے بہت تکلیف میں نکلے، میری صورتحال سمجھنے کی کوشش کریں۔

ان کا کہنا تھا کہ کیا مریم نواز کسی کی ماں یا بہن نہیں ہیں؟عظمیٰ بخاری نے کہا میں بھی کسی کی ماں ہوں لیکن جو سر کے بالوں سے پیر کے ناخن تک ٹرولنگ ہمیں برداشت کرنا پڑتی ہے تو ایک صبر ہے جو کبھی کبھی ختم ہوجاتا ہے۔

ان کا کہناتھا (ن) لیگ کی خواتین کے خلاف باقاعدہ مہم ہوتی ہے، مریم نواز کے کپڑوں پر اور ان کے خلاف استعمال کیے جانے والے الفاظ نہایت ہی غلط ہوتے ہیں۔

انہوں نے مزید کہا کہ ابھی مریم نواز کشتی پر سوار ہوکر شاہدرہ کے دورے پر گئیں ، اس پر لوگوں نے ٹرولنگ کی اور ایک مہم چلائی، مریم نواز پنجاب کے لیے کیا کررہی ہیں اور انہوں نے اب تک کیا کیا، اس پر بات کیوں نہیں ہوتی؟ ہمیشہ خواتین کے کپڑوں پر بات کرنا ضروری ہے؟ 

خیال رہے کہ کچھ روز قبل وزیر اطلاعات پنجاب عظمیٰ بخاری نے ایک پریس کانفرنس میں خواتین کے لباس سے متعلق بات کی تھی جس میں انہوں نے وزیراعلیٰ پنجاب مریم نواز کا دفاع کرتے ہوئے کہا تھا کہ ’جو مریم نواز کے لباس پر تنقید کرتے ہیں وہ اپنے گریبانوں میں جھانکیں جن کی اپنی امیاں کپڑے پہننا ہی مناسب نہیں سمجھتیں‘۔