اسحاق ڈار اور آرمینیائی وزیر خارجہ کے مابین ٹیلیفونک  رابطہ، سفارتی تعلقات کے قیام پرغور

اسلام آباد: پاکستان اور آرمینیا  نے  سفارتی  تعلقات کے قیام پرغور کرنے پراتفاق کرلیا۔

تفصیلات کے مطابق نائب وزیراعظم و وزیر خارجہ اسحاق ڈار اور آرمینیا کے وزیر خارجہ کے مابین  ٹیلیفونک رابطہ ہوا ہے۔

ترجمان دفتر خارجہ کے مطابق نے دوران گفتگو پاکستان اور آرمینیا کے وزرائے خارجہ نے سفارتی تعلقات پر بات چیت کی اور دونوں ممالک کے درمیان سفارتی تعلقات کے قیام پر غور کرنے پر اتفاق کیا۔

دوسری جانب میڈیا سے گفتگو میں وزیر خارجہ و نائب وزیراعظم اسحاق ڈار نے کہا کہ  پاکستان نے آرمینیا اور پاکستان کے درمیان تعلقات کے قیام پرغور کرنے پراتفاق کیا ہے۔

اسحاق ڈار نے کہا کہ ہم ابھی بھی آذربائیجان کے ساتھ کھڑے ہیں، آذربائیجان اور آرمینیا کے درمیان معاملات حل ہوچکےہیں، ان کا مزید کہنا تھا کہ دونوں ممالک کے مابین  آپس میں معاملات درست ہوچکے تو ہمیں کیا مسئلہ ہے؟

خیال رہے کہ پاک آذربائیجان دوستی اور نگورنوکاراباخ کے متنازعہ علاقہ کی وجہ سے پاکستان نے آرمینیا کو تسلیم نہیں کیا  اور نہ ہی اس ملک سے کوئی سفارتی تعلقات ہیں۔

جبکہ چند روز قبل وائٹ ہاؤس میں آذربائیجان کے صدر الہام علیوف اور آرمینیا کے وزیراعظم نیکول پشینیان نے امریکا کے صدر ڈونلڈ ٹرمپ سے ملاقات کی جس میں دونوں ممالک  مکمل جنگ بندی کے معاہدے پر دستخط کیے اور آئندہ پر امن طریقے سے معاملات کو حل کرنے پر اتفاق کیا، جس کے بعد دونوں ممالک نے امریکی صدر ڈونلڈ ٹرمپ کو نوبل پیس پرائز کے لیے نامزد کیا تھا۔

صدر ٹرمپ نے اس موقع پر بطور ثالث اور گواہ کے طور پر دستخط کیے جس کے بعد آذربائیجان اور آرمینیا نے مکمل جنگ بندی کا معاہدہ ہوا۔