پاکستان فلم اور اسٹیج انڈسٹری کے نامور اداکار انور علی انتقال کر گئے

لاہور: پاکستانی فلم اسٹیج انڈسٹری اور ٹی وی کے نامور اداکار انور علی انتقال کر گئے۔

 خاندانی ذرائع کے مطابق اداکار انور علی گزشتہ کچھ عرصے سے پھیپھڑوں اور گردوں کے عارضے میں مبتلا تھے۔کل طبیعت بگڑنے پر انہیں رائیونڈ روڈ کے ایک نجی اسپتال میں داخل کرایا گیا تھا تاہم وہ جانبر نہ ہو سکے۔ مرحوم کی نمازِ جنازہ کا اعلان تاحال نہیں کیا گیا۔

انور علی نے اپنے فنی کیریئر کا آغاز تھیٹر سے کیا اور جلد ہی اپنی منفرد مزاحیہ اداکاری اور بھرپور اسٹیج پرفارمنس کے باعث پہچان بنائی۔

خیال رہے کہ انور علی کا شمار پاکستانی فلم اور تھیٹر کی دنیا کے بہترین کامیڈینز اور اداکاروں میں ہوتا ہے جنہوں نے اپنی انفرادیت اور مزاح کے ذریعے لاکھوں دل جیتے، انہوں نے اسٹیج کے ساتھ ساتھ ٹی وی اور فلم میں بھی اپنی صلاحیتوں کا لوہا منوایا۔

انور علی  نے مختلف مزاحیہ ڈراموں میں اپنی فطری اداکاری کے ذریعے ناظرین کو متاثر کیا اور گھریلو ناظرین کے لیے مسکراہٹوں کا باعث بنے،وہ ہمیشہ نئے فنکاروں کے لیے رہنمائی کا ذریعہ رہے اور اپنے ساتھی فنکاروں کے ساتھ خوش اخلاقی اور دوستانہ رویے کے باعث بھی جانے جاتے تھے۔

دوسری جانب پاکستان کی شوبز انڈسٹری نے انور علی کے انتقال پر گہرے دکھ اور افسوس کا اظہار کیا ہے،ان کا کہنا ہے کہ مرحوم اپنی مزاحیہ صلاحیتوں اور یادگار کرداروں کے باعث مداحوں کے دلوں میں ہمیشہ زندہ رہیں گے۔