سیلاب کے باعث سیالکوٹ ائیرپورٹ پر معطل فضائی آپریشن بحال، نوٹم جاری

سیالکوٹ: شدید سیلابی صورتحال کے باعث سیالکوٹ انٹرنیشنل ائرپورٹ پر معطل  تمام فضائی آپریشن بحال کردیا گیا۔

اس حوالے سے اائیر پورٹ انتظامیہ کی جانب سے نوٹم جاری کر دیا گیا ہے۔

 ترجمان ائیرپورٹ محمد عمیر خان آج شام 6 بجے سے سیالکوٹ ائیرپورٹ پر تمام تر فضائی آپریشن بحال کردیا جائے گا، تمام فلائٹ آپریشن کو سیلابی پانی کے باعث عارضی طور پر معطل کیا گیا تھا،ائرپورٹ سے سیلابی پانی کا اخراج تاحال بھی جاری ہے۔

ترجمان نے بتایا کہ فضائی آپریشن کی معطلی کے دوران ایئرپورٹ سے سیلابی پانی کے اخراج کا عمل جاری رہا، جس کے بعد رن وے، ٹرمینل اوردیگرآپریشنل شعبہ جات کومکمل طور پرمحفوظ قراردے دیا گیا ہے۔

ان کا کہنا تھا کہ ایئرپورٹ پرنصب تمام آلات مکمل طور پرمحفوظ ہیں اورکسی بھی قسم کا تکنیکی نقصان نہیں ہوا۔ 

ترجمان نے مزید بتایا کہ مسافروں کی سہولت اور پروازوں کی بحالی کے لیے ایوی ایشن اتھارٹی اورایئرپورٹ انتظامیہ نے مربوط اقدامات کیے ہیں، جن کے باعث فلائٹ شیڈول اب معمول کے مطابق جاری رکھا جائے گا۔

ایئرپورٹ ذرائع کے مطابق متعلقہ ایئرلائنزکو فلائٹ بحالی سے متعلق آگاہ کردیا گیا ہے۔