خیبرپختونخوا اسمبلی میں افغانستان میں زلزلے سے جانی و مالی نقصان پر اظہارِ افسوس، متفقہ قرارداد منظور

خیبرپختونخوا اسمبلی نے افغانستان کے صوبہ کنڑ میں آنے والے شدید زلزلے سے ہونے والے جانی و مالی نقصان پر گہرے دکھ اور افسوس کا اظہار کیا ہے۔ حکومت اور اپوزیشن نے اس حوالے سے ایک متفقہ قرارداد منظور کی۔

قرارداد میں کہا گیا ہے کہ افغان بھائیوں کی ہر ممکن مدد کو اسلامی اور اخلاقی فریضہ سمجھا جاتا ہے۔ اراکین اسمبلی نے زلزلے میں جاں بحق افراد کے لیے دعائے مغفرت اور زخمیوں کی جلد صحت یابی کے لیے دعا کی۔

مزید کہا گیا کہ شدید زخمیوں کو بغیر ویزا پاکستان منتقل کر کے علاج کی سہولت فراہم کی جائے۔

قرارداد میں وفاقی اور صوبائی حکومتوں پر زور دیا گیا کہ وہ باہمی تعاون کے ساتھ امدادی ٹیمیں اور طبی سامان فوری طور پر افغانستان روانہ کریں۔

یاد رہے کہ افغانستان کے صوبہ کنڑ میں گزشتہ رات آنے والے 6 شدت کے زلزلے کے نتیجے میں اب تک 800 افراد جاں بحق جبکہ ایک ہزار سے زائد زخمی ہو چکے ہیں۔ بڑی تعداد میں لوگ ملبے تلے دبے ہوئے ہیں، جس کے باعث ہلاکتوں میں اضافے کا خدشہ ہے۔