خدمت کا پرخلوص جذبہ پاکستان کی سماجی و معاشرتی اقدار اور تہذیب کا اثاثہ ہے،شہباز شریف

اسلام آباد: وزیر اعظم شہبا زشریف نے کہا ہے کہ  خدمت کا پرخلوص جذبہ پاکستان کی سماجی و معاشرتی اقدار اور تہذیب کا اثاثہ ہے، رضاکار خدمت کاروں نے ایمرجنسی حالات میں ہمیشہ اہل وطن کی بھرپور مدد کی ہے۔

تفصیلات کے مطابق عطیات کے عالمی دن پر وزیر اعظم شہباز شریف نے اپنے پیغام میں کہا ہے کہ پاکستانی بلا رنگ و نسل دوسروں کی بے لوث مدد کرنے میں فخر محسوس کرتے ہیں۔

اپنے پیغام میں شہباز شریف نے کہا کہ عالمی سطح پر پاکستان کا نام سب سے زیادہ عطیات دینے والے ممالک میں شامل ہے، حکومت پاکستان غربت میں کمی اور فلاحی منصوبوں پر کام کر رہی ہے۔

شہباز شریف نے مزید کہا کہ خدمت کا پرخلوص جذبہ پاکستان کی سماجی و معاشرتی اقدار اور تہذیب کا اثاثہ ہے، بلکہ اسلامی تعلیمات اور ہماری تہذیب کی بھی روشن علامت ہے، رضاکار خدمت کاروں نے ایمرجنسی حالات میں ہمیشہ اہل وطن کی بھرپور مدد کی ہے۔

اپنے بیان میں انہوں نے مزید کہا کہ سیلابی صورتحال کے پیش نظر امداد کے اس جذبہ نے اہمیت اختیار کر لی ہے، سیلاب میں متاثرہ آبادی کے مال مویشی، روزگار اور گھروں کو شدید نقصان پہنچا ہے۔

وزیراعظم کا کہنا تھا کہ حالیہ شدید بارشوں اور سیلابی صورتحال کے پیش نظر باہمی رواداری، امداد و عطیات کے اس سماجی جذبے نے اور بھی اہمیت اختیار کر لی ہے، حالیہ سیلابی صورتحال کے پیش نظر متاثرہ آبادی کے مال و مویشی، روزگار اور گھروں کو شدید نقصان پہنچا ہے۔

شہباز شریف نے کہا کہ عطیات کے عالمی دن پر آج میں پاکستانی عوام اور دنیا بھر میں موجود پاکستانیوں سے سیلاب کے بعد ریلیف اور بحالی کے کاموں میں اپنے ہم وطنوں کی ہر ممکن مدد کرنے کی یاد دہانی کرواتا ہوں، باہمی رواداری اور مدد کے جذبے پر عمل پیرا ہوتے ہوئے ہم بحیثیت قوم ترقی و خوشحالی، باوقار اور مضبوط مستقبل کے لیے پرعزم ہیں۔

وزیر اعظم نے مزید کہا ہے کہ متاثرہ آبادی اشیائے خور و نوش، چھت اور صحت کی سہولیات کے منتظر ہیں جس کے لیے وفاقی حکومت، صوبائی حکومتیں، عوام اور فوج سب مل کر ریسکیو اینڈ ریلیف آپریشن کو جاری رکھے ہوئے ہیں۔