ڈاکٹرعافیہ صدیقی کیس سماعت کے لیے مقرر ،عدالت نےلارجر بینچ تشکیل دے دیا

اسلام آباد: امریکی جیل میں قید ڈاکٹر عافیہ صدیقی کیس سماعت کے لیے مقرر ہو گیا ہے اس حوالے سے عدالت نے لارجر بینچ تشکیل دے دیا ہے۔

تفصیلات کے مطابق اسلام آباد ہائیکورٹ میں ڈاکٹر عافیہ صدیقی کیس کی سماعت 10 ستمبر ہو گی جبکہ اس حوالے سے لارجر بینچ بھی تشکیل دے دیا گیا ہے۔

لارجر بنچ کی سربراہی جسٹس ارباب محمد طاہر کریں گے جبکہ جسٹس خادم حسین سومرو، جسٹس اعظم خان اور جسٹس راجہ انعام امین منہاس بھی بنچ میں شامل ہوں گے۔

ذرائع کا کہنا ہے کہ یکم ستمبر کو جسٹس انعام امین منہاس نے فائل چیف جسٹس کو لارجر بنچ تشکیل دینے کے لیے بھجوائی تھی۔

خیال رہے کہ اس سے قبل کیس جسٹس سردار اعجاز اسحاق کی عدالت میں زیر سماعت تھا جنہوں نے گزشتہ سماعت پر وزیراعظم اور کابینہ ارکان کو توہین عدالت کے نوٹسز جاری کیے تھے۔

اس سے قبل کیس جسٹس سردار اعجاز اسحاق خان کی عدالت میں زیر سماعت تھا جنہوں نے گزشتہ سماعت پر وزیراعظم اور کابینہ ارکان کو توہین عدالت کے نوٹسز جاری کیے تھے تاہم جسٹس اعجاز اسحاق خان کے ٹیکس کیسز کے لیے اسپیشل ڈویژن بینچ کا حصہ بننے کے بعد ان کے سنگل بنچ کے کیسز ٹرانسفر کر دیئے گئے تھے۔