غزہ: اسرائیلی حملوں میں ہر گھنٹے ایک بچہ شہید، اب تک 20 ہزار بچے شہید

بین الاقوامی تنظیم ’سیو دی چلڈرن‘ نے انکشاف کیا ہے کہ اسرائیلی حملوں کے باعث گزشتہ 23 ماہ سے جاری جنگ میں اوسطاً ہر گھنٹے ایک فلسطینی بچہ شہید ہو رہا ہے۔

قطر کے نشریاتی ادارے الجزیرہ کی رپورٹ کے مطابق، غزہ میں اکتوبر 2023 سے اب تک کم از کم 20 ہزار بچے شہید ہو چکے ہیں، جو علاقے کی مجموعی بچوں کی آبادی کا تقریباً 2 فیصد بنتے ہیں۔ ان میں سے کم از کم 1,009 بچوں کی عمر ایک سال سے بھی کم تھی، جن میں تقریباً 450 بچے ایسے تھے جو اسی جنگ کے دوران پیدا ہوئے اور شہید ہو گئے۔

سیو دی چلڈرن کے ریجنل ڈائریکٹر احمد الہندوی نے اسے انسانی تاریخ کا شرمناک باب قرار دیتے ہوئے کہا کہ بچوں پر منظم حملے، بھوک کو بطور ہتھیار استعمال کرنا اور عالمی برادری کی خاموشی ناقابلِ قبول ہے۔ ادھر اقوام متحدہ کے بچوں کے ادارے (یونیسف) کی ترجمان ٹیس انگرام نے بتایا کہ اسرائیلی فوج کی جانب سے غزہ سٹی سے زبردستی بے دخلی کی مہم سے 10 لاکھ فلسطینی متاثر ہوں گے، جن میں نصف تعداد بچوں پر مشتمل ہے۔

ان کا کہنا تھا کہ المواسی جیسے چھوٹے، غیر محفوظ علاقے میں نہ صرف بنیادی سہولیات کا فقدان ہے بلکہ بمباری بھی جاری ہے، جہاں صرف چند دن پہلے پانی کے انتظار میں 8 بچے شہید کیے گئے۔ انہوں نے کہا کہ جو المیہ ہم سے ہمیشہ خوفزدہ رہتے تھے، وہ اب ہماری آنکھوں کے سامنے رونما ہو رہا ہے۔