گلگت بلتستان: پولیس اہلکاروں کے ٹک ٹاک کے استعمال کرنے پر پابندی عائد

گلگت: انسپکٹر جنرل ( آئی جی ) پولیس گلگت بلتستان نے پولیس اہلکاروں کے سوشل میڈیا پلیٹ فارم ٹک ٹاک کے استعمال پر پابندی عائد کردی۔ 

تفصیلات کےمطابق آئی جی پولیس گلگت بلتستان کی جانب جاری یک نوٹیفکیشن میں کہا گیا کہ  ڈسپلن، یکسانیت اور فورس کے وقار کو قائم رکھنے کے لیے یہ ہدایت کی جاتی ہے کہ کوئی بھی جی بی پولیس افسر/اہلکار سوشل میڈیا پلیٹ فارم (ٹک ٹاک) استعمال نہیں کرے گا۔

نوٹیفکیشن میں تمام ضلعی پولیس افسران اور یونٹ ہیڈز کو حکم دیا گیا کہ وہ اپنے ماتحت تمام اہلکاروں کو اس ہدایت سے آگاہ کریں، اور خبردار کیا گیا کہ کسی بھی خلاف ورزی کو سنگین طور پر لیا جائے گا اور اس پر محکمانہ کارروائی ہوگی۔

واضح رہے کہ جولائی میں اسلام آباد پولیس کے دو اہلکاروں کو وردی میں ٹک ٹاک ویڈیوز بنا کر اپ لوڈ کرنے پر معطل کر دیا گیا تھا اور درجنوں اہلکاروں کو اپنے اکاؤنٹس ڈیلیٹ کرنے کی ہدایت دی گئی تھی۔

جبکہ اس سے قبل مارچ میں پنجاب پولیس کی جانب سے بھی اپنے اہلکاروں کو ذاتی سوشل میڈیا اکاؤنٹس کے ذریعے ریاست کے خلاف ’ توہین آمیز خیالات’ ظاہر کرنے سے خبردار کیا گیا تھا۔