کراچی : ملیر اور لیاری ندیاں بپھرنے سے پانی رہائشی علاقوں میں داخل، پاک فوج سے مدد طلب

کراچی میں ملیر اور لیاری ندیاں بپھرنے سے پانی رہائشی علاقوں میں داخل ہونے کے بعد میئر کراچی نے صورتحال کا جائزہ لینےکے لیے رات گئے مختلف مقامات کا دورہ کیا۔

میئر کراچی  ایم 9 موٹروے پر شہبازگوٹھ بھی پہنچے، سپر ہائی وے پر میڈیا سے گفتگو  کرتے ہوئے کہا کہ چیف سیکرٹری کے ذریعے پاک فوج سے مدد کی درخواست کی۔ پاک فوج کے دستے بھی موقع پر پہنچ گئے ہیں۔

ان کا کہنا تھا کہ پانی کا لیول چند گھنٹے قبل خطرناک حد پر تھا، مسلسل کاوشوں سے پانی کا لیول اب نمایاں طور پر کم ہے، لیاری ندی کا دورہ کیا صورتحال وہاں بھی بہتر ہے۔

انہوں نے کہا کہ  شہری مسائل کے حل کے لیے تمام ممکنہ اقدامات کئے جا رہے ہیں، موٹر وے بند کرنے کا مقصد شہری جانوں کو نقصان سے بچانا ہے، میئر کراچی نے امید ظاہر کی کہ  چند گھنٹوں میں پانی کی سطح مزید کم ہوجائےگی۔اب تک 200 سے زائد افراد کو ریسکیو کرچکے۔

مرتضیٰ وہاب کا کہنا ہے کہ شہریوں کی سہولت کے لیے 4 ریلیف سینٹرز قائم کردیے گئے ہیں، متاثرہ افراد کو  ریلیف سینٹرز  میں محفوظ طریقے سے منتقل کیا، پانی کی نکاسی ہنگامی بنیادوں پر شروع کر دی گئی۔

دوسری جانب کراچی میں وقفے وقفے سے تیزبارش ہوئی، مختلف علاقوں میں اربن فلڈنگ ہوئی۔

سرجانی اور ناگن چورنگی میں پانی آبادیوں میں داخل ہوگیا، ایوب گوٹھ پل اورلاسی گوٹھ پرملیرندی کا پانی اوور فلو ہوگیا، پانی لوگوں کے گھروں میں داخل ہوگیا، تھڈوڈیم بھرنے کے بعد لیاری اور ملیر ندیاں بپھرگئیں۔

نشتر بستی، عیسیٰ نگری سمیت پانی اطراف کی آبادیوں میں داخل ہوگیا، تھڈو ڈیم کا پانی موٹروے ایم 9 سے ٹکرا گیا، حیدرآباد جانے والے ٹریک پر پانی جمع ہوگیا جس سے ٹریفک کی روانی شدید متاثر ہوئی۔

سہراب گوٹھ حسن منان کالونی اور گلشن اقبال میں ریسکیو آپریشن کیا گیا، سیلابی پانی میں پھنسے افراد کو باحفاظت نکال لیا گیا، کراچی میں آج تمام تعلیمی ادارے بند رہیں گے، قائم مقام کمشنر کراچی نے نوٹیفکیشن جاری کر دیا۔

میئرکراچی مرتضیٰ وہاب نے شہر کے مختلف علاقوں کا دورہ کیا، نکاسی آب کے انتظامات کا جائزہ لیا۔