لاس اینجلس میں امریکی ریپر ڈیوڈ انتھونی برک کی گاڑی سے مسخ شدہ لاش برآمد

لاس اینجلس میں پیش آنے والے پراسرار واقعے نے امریکی شوبز انڈسٹری میں ہلچل مچا دی ہے، جہاں پولیس کو معروف نوجوان ریپ اسٹار ڈیوڈ انتھونی برک کے نام پر رجسٹرڈ گاڑی کی ڈگی سے ایک مسخ شدہ لاش ملی ہے۔

لاس اینجلس پولیس ڈیپارٹمنٹ کے مطابق یہ لاش پلاسٹک بیگ میں لپٹی ہوئی تھی اور گاڑی کئی دن سے ایک گھر کے باہر کھڑی تھی۔ مقامی رہائشیوں نے گھر سے اٹھنے والی شدید بدبو پر پولیس کو اطلاع دی، جس پر موقع پر پہنچ کر یہ خوفناک انکشاف ہوا۔

بتایا گیا ہے کہ یہ گاڑی امریکی ریاست ٹیکساس میں ریپر ڈیوڈ انتھونی برک کے نام پر رجسٹرڈ ہے۔ اس پیش رفت نے مزید سوالات کو جنم دیا ہے کیونکہ 20 سالہ ریپر اپنے ورلڈ ٹور پر ہے اور اسے آئندہ چند دنوں میں مینیسوٹا کے شہر منیپولس میں پرفارم کرنا تھا۔

ڈیوڈ انتھونی برک، جسے 2022 میں اپنے وائرل گانے "رومانٹک ہومیسائیڈ" سے شہرت ملی، نوجوانوں میں خاصا مقبول ہے، اور اس کا سوشل میڈیا پر وسیع مداحوں کا حلقہ ہے۔

تاحال یہ واضح نہیں کہ لاش کا تعلق براہِ راست برک سے ہے یا نہیں، اور پولیس اس معاملے کی مکمل تفتیش کر رہی ہے۔ واقعے نے مداحوں کو تشویش میں مبتلا کر دیا ہے اور حکام جلد حقائق سامنے لانے کے لیے کوشاں ہیں۔