دبئی میں پاک-بھارت دوستی، بھارتی شائقین کی اپنی ٹیم کے رویے پر تنقید

ایشیا کپ کے حالیہ میچ کے دوران بھارتی اور پاکستانی شائقینِ کرکٹ کے درمیان خوشگوار ماحول، ہم آہنگی اور باہمی احترام دیکھنے میں آیا، جس نے بھارتی میڈیا کے منفی اور اشتعال انگیز بیانیے کو ناکام بنا دیا۔

دبئی میں موجود شائقین نے کرکٹ کو ایک کھیل کے طور پر سراہا اور دونوں ممالک کے درمیان تعلقات میں بہتری کی خواہش کا اظہار کیا۔ بھارتی شائقین نے اپنی ٹیم کے رویے پر مایوسی کا اظہار کرتے ہوئے کہا کہ پاکستانی کھلاڑیوں سے ہاتھ نہ ملانا کھیل کی روح کے منافی عمل تھا۔

"ہماری ٹیم نے غلط رویہ اپنایا": بھارتی شائقین

بھارتی شائقین نے کھل کر کہا کہ "دونوں ملکوں کے عوام ایک دوسرے کے قریب ہیں، لیکن ہماری ٹیم نے پاکستان کے کھلاڑیوں سے ہاتھ نہ ملا کر غلط کیا"۔ ایک بھارتی مداح نے کہا کہ وہ پاکستان آنا چاہتے ہیں، جب کہ دوسرے نے میچ کے بعد اپنے پاکستانی دوست کو تسلی دی۔

گراؤنڈ میں دوستی کی جھلک

میچ کے دوران ایک خوبصورت لمحہ اس وقت دیکھنے کو ملا جب مشہور بھارتی کرکٹ فین سدھیر نے پاکستانی فین چاچا کرکٹ سے نہ صرف ہاتھ ملایا بلکہ گلے بھی لگے، جسے اسٹیڈیم میں موجود ہزاروں افراد نے سراہا۔

میڈیا اور عوام کا متضاد رویہ

ایک جانب بھارتی میڈیا اور کچھ اینکرز کرکٹ جیسے شائستہ کھیل کو نفرت انگیزی کا ذریعہ بناتے دکھائی دیے، تو دوسری جانب بھارتی عوام نے کرکٹ کو خالصتاً ایک کھیل سمجھ کر مثبت رویہ اپنایا۔

مزید مقابلے باقی

واضح رہے کہ ایشیا کپ میں پاکستان اور بھارت کے درمیان ممکنہ طور پر فائنل سمیت دو اور میچز متوقع ہیں۔ دبئی میں موجود شائقین کو امید ہے کہ دونوں ٹیمیں نہ صرف بہترین کھیل کا مظاہرہ کریں گی بلکہ اسپورٹس مین اسپرٹ کا بھی خیال رکھیں گی۔