امریکا ، چین مذاکرات میں پیشرفت ، ٹک ٹاک سمیت متعدد تجارتی معاملات پر آمادگی

واشنگٹن : امریکی صدر ڈونلڈ ٹرمپ نے دعویٰ کیا ہے کہ امریکا اور چین کے درمیان ٹک ٹاک کی فروخت اور دیگر کاروباری معاملات مذاکرات کے ذریعے حل کرنے پر اتفاق ہوگیا ہے۔

امریکی وزیر خزانہ اسکاٹ بیسنٹ اور تجارتی نمائندہ جیمیسن گریر نے اسپین کے شہر میڈرڈ میں 15 ستمبر کو ہونے والے اعلی سطحی مذاکرات کے بعد کہا کہ دونوں ممالک معاہدوں کو حتمی شکل دینے پر متفق ہو گئے ہیں ، تاہم انہوں نے معاہدے کی تفصیلات یا تجارتی شرائط واضح نہیں کی۔ 

ٹرمپ نے اپنے سوشل میڈیا پلیٹ فارم ـ ٹروتھ سوشل پر پوسٹ کرتے ہوئے کہا کہ یورپ میں امریکہ اور چین کے درمیان بڑا تجارتی اجلاس کامیاب رہا۔ 
انہوں نے مزید کہا کہ ایک خاص کمپنی پر بھی معاہدہ ہو گیا ہے جسے امریکی نوجوان بچانا چاہتے تھے، اب نوجوان بہت خوش ہوں گے۔ 
امریکی صدر نے اعلان کیا کہ وہ 19 ستمبر کو چینی صدر شی چن پنگ سے بات کریں گے تا کہ دونوں ممالک کے درمیان طے پانے والے معاہدوں کو مزید آگے بڑھایا جا سکے،ان کا کہنا تھا کہ امریکہ اور چین کے تعلقات اب بھی مضبوط ہیں۔

انٹرنیشنل میڈیاکے مطابق میڈرڈ میں ہونے والے مذاکرات میں ٹک ٹاک کی فروخت سمیت وسیع تر معاشی پالیسیوں پر بھی تبادلہ خیال ہوا۔ 
دو روز قبل چین نے امریکہ پر زور دیا تھا کہ وہ ٹک ٹاک پر پابندی یا اس کی ملکیت کے معاملے کو مزاکرات کے ذریعے حل کرے۔ 
ٹک ٹاک کو امریکہ میں 17 ستمبر تک بند کیے جانے کا خطرہ ہے لیکن ٹرمپ نے عندیا کیا ہے کہ وہ پابندی کی مدت میں توسیع کر سکتے ہیں ۔ 
امریکی حکام کا کہنا ہے کہ چینی حکومت اس ایپ کے ذریعے صارفین کاحساس ڈیٹاحاصل کر سکتی ہے یا پروپیگنڈا پھیلا سکتی ہے تاہم ٹک ٹاک نے ان الزامات کی بارہا تردید کی ہے۔ 

خیال رہے کہ امریکا میں ٹک ٹاک پر پابندی کا قانون گزشتہ سال منظور کیا گیا تھا جس کے تحت 20 جنوری 2025 تک اس کی ملکیت امریکی کمپنی کو منتقل کرنا لازمی ہے۔