سی ٹی ڈی کی کارروائی میں چمکنی خودکش حملے کے ماسٹر مائنڈ سمیت 3 دہشتگرد مارے گئے

خیبر: صوبہ خیبر پختونخوا کے ضلع خیبر میں محکمہ انسداد دہشت گردی( سی ٹی ڈی) کی کارروائی میں فتنہ الخوارج کےتین دہشت گرد مارے گئے۔

ترجمان سی ٹی ڈی کے مطابق یہ کارروائی ضلع خیبر کے علاقے لالہ چینہ دو سار میں کی گئی جہاں دہشت گردوں کی موجودگی کی اطلاع ملی تھی۔

 ترجمان کا کہنا ہے کہ مارے جانے والے دہشت گردجن میں ایک افغان شہری بھی شامل ہے خودکش دھماکوں اور دیگر سنگین دہشت گردانہ سرگرمیوں میں ملوث تھے،جبکہ دہشت گرد نعیم چمکنی، جو خودکش دھماکے کا ماسٹر مائنڈ تھا، بھی اس کارروائی میں مارا گیا۔

ترجمان کے مطابق ہلاک دہشت گردوں کے قبضے سے تین ایس ایم جیز، بارہ میگزین، 135 کارتوس اور تین بنڈولیئر برآمد کیے گئے ہیں

 سی ٹی ڈی کے مطابق دہشت گرد کمانڈر فضل نور ساتھیوں کے ہمراہ فرار ہونے میں کامیاب ہو گیا ہے اور اس کی گرفتاری کے لیے علاقے میں چھاپے مارے جا رہے ہیں۔

سی ٹی ڈی حکام کا کہنا ہے کہ دہشت گرد بڑی کارروائی کی منصوبہ بندی کر رہے تھے جسے بروقت کارروائی کے ذریعے ناکام بنا دیا گیا۔ 

ترجمان نے مزید کہا کہ علاقے میں بھاری نفری تعینات کر کے سرچ آپریشن جاری ہے اور فرار دہشت گردوں کی گرفتاری کے لیے محاصرہ مزید سخت کر دیا گیا ہے۔