پنجاب کے دریاؤں میں پانی کی سطح میں نمایاں کمی  ، سیلابی صورتحال معمول پر آ گئی

پراونشل ڈیزاسٹر مینجمنٹ اتھارٹی (پی ڈی ایم اے) نے کہا ہے کہ پنجاب کے دریاؤں میں پانی کی سطح میں نمایاں کمی  کے ساتھ سیلابی صورتحال معمول پر آ گئی ہے۔

سیلابی صورتحال پر جاری کیے گئے بیان میں پی ڈی ایم اے نے کہا کہ صوبے کے بیشتر دریاؤں میں پانی کا بہاؤ نارمل ہو چکا ہے۔ دریاؤں کے ساتھ ساتھ سیلاب سے متاثرہ علاقوں میں بھی پانی کی سطح تیزی سے نیچے آئی ہے۔

دریائے ستلج گنڈا سنگھ والا کے مقام پر پانی کا بہاؤ 98 ہزار کیوسک، سلیمانکی میں 82 ہزار کیوسک جبکہ دریائے چناب مرالہ کے مقام پر 43 ہزار کیوسک ریکارڈ کیا گیا۔دریائے چناب میں خانکی ہیڈ ورکس پر پانی کا بہاؤ 38 ہزار کیوسک اور قادر آباد میں 37 ہزار کیوسک ہے۔ ہیڈ تریموں پر بھی پانی کا بہاؤ 38 ہزار کیوسک ریکارڈ کیا گیا ہے۔

پی ڈی ایم اے کا کہنا ہے کہ پنجند کے مقام پر پانی کا بہاؤ 1 لاکھ 18 ہزار کیوسک تک پہنچ گیا ہے جبکہ دریائے راوی جسڑ کے مقام پر بہاؤ 7 ہزار کیوسک ہے۔ صورتحال مسلسل مانیٹر کی جا رہی ہے اور کسی بھی ہنگامی صورتحال سے نمٹنے کیلئے تمام ادارے الرٹ ہیں۔

دوسری جانب صوبے میں سیلاب سے متاثرہ علاقوں میں  روڈز کی بحالی  کا کام تیزی سے جاری ہے۔ صوبے کے مختلف علاقوں میں سیلابی ریلوں سے پڑنے والے شگاف بھرنے کے لیے بھاری مشینری سے مدد لی جا رہی ہے۔ کل کنول روڈ ، بستی عظیم شاہ، اور خیرپور سلطان پور روڈ پر پڑے شگاف پر پر کر کے سڑکیں عوام  کے لیے کھول دی گئی ہیں۔

اس کے علاوہ علی پور، ماڑی روڈ، اورعظمت پور میں پڑنے والے شگافوں کو پر کرنے اور روڈز کی بحالی  کیلئے ٹیمیں سرگرم ہیں۔ عوام کی سہولت کے لیے علی پور میں عارضی پل بنا کر عام ٹریفک کے لیے کھول دیا گیا ہے۔