ٹرمپ کا بڑا اعلان: بھارتی ادویات پر 100 فیصد درآمدی ٹیکس

امریکا نے بھارت کے لیے مشکلات میں مزید اضافہ کرتے ہوئے دواسازی مصنوعات پر 100 فیصد ٹیرف لگانے کا اعلان کیا ہے۔

خبر رساں اداروں کے مطابق، امریکا نے کچن کیبنٹس اور باتھ روم وینٹیز پر 50 فیصد، فرنیچر پر 30 فیصد اور ہیوی ڈیوٹی ٹرکوں پر 25 فیصد درآمدی ٹیکس عائد کر دیا ہے۔

اسی سلسلے میں، فارماسیوٹیکل مصنوعات پر 100 فیصد ٹیرف عائد کرنے کا اعلان بھی سامنے آیا ہے۔

سابق امریکی صدر ڈونلڈ ٹرمپ نے اپنے سوشل میڈیا پلیٹ فارم "ٹروتھ سوشل" پر جاری بیان میں کہا کہ یکم اکتوبر سے امریکا میں درآمد کی جانے والی ادویات پر 100 فیصد ٹیرف لاگو ہوگا۔

ٹرمپ کے مطابق، اگر کمپنیاں امریکا میں ادویات بنانے کے پلانٹس لگائیں گی تو انہیں اس ٹیرف سے استثنا حاصل ہوگا۔ انہوں نے کہا کہ یہ اقدام مختلف وجوہات کے باعث اٹھایا جا رہا ہے، تاہم سب سے اہم وجہ قومی سلامتی کے تحفظات ہیں۔

امریکی فیصلے کے بعد بھارت کے لیے صورتحال مزید پیچیدہ ہو گئی ہے، کیونکہ بھارت دنیا کے بڑے دواساز ممالک میں شمار ہوتا ہے، اور امریکا میں استعمال ہونے والی ایک تہائی سے زائد ادویات بھارت سے درآمد کی جاتی ہیں۔

"انڈیا ٹوڈے" کی رپورٹ کے مطابق، بھارت ہر سال تقریباً 10 ارب ڈالر کی فارماسیوٹیکل مصنوعات امریکا کو ایکسپورٹ کرتا ہے۔

واضح رہے کہ حالیہ مہینوں میں بھارت اور امریکا کے تعلقات میں تناؤ دیکھا گیا ہے، اور امریکا نے بھارت سے آنے والی کئی اشیاء پر پہلے ہی 50 فیصد ٹیرف نافذ کر رکھا ہے، جس سے بھارتی برآمدکنندگان متاثر ہو رہے ہیں۔