غزہ بحران: نیتن یاہو کو عالمی سطح پر بائیکاٹ کا سامنا،دوران تقریر متعدد ممالک کے نمائندوں کا واک آؤٹ

نیویارک : اسرائیلی وزیر اعظم نیتن یاہو کو عالمی سطح پر ایک دفعہ پھر بائیکاٹ کا سامنا کرنا پڑ گیا،اقوام متحدہ کی جنرل اسمبلی کے  اجلاس میں اسرائیلی وزیراعظم نیتن یاہو کے  خطاب کے دوران کئی ممالک کے وفود اٹھ کر چلے گئے۔

تفصیلات کے مطابق اقوام متحدہ میں آج اجلاس کی کارروائی شروع ہوتے ہی سب سے پہلے اسرائیلی وزیراعظم نیتن یاہو کو خطاب کے لیے دعوت دی گئی،جیسے ہی اسرائیلی وزیر اعظم کے اسٹیج پروہیں متعدد ممالک کے وفود ہال سے باہر چلے گئے۔

خیال رہے کہ اس سے  قبل غیر ملکی میڈیا نے رپورٹ کیا تھا کہ نیتن یاہو کے آج جنرل اسمبلی اجلاس سے خطاب کے موقع پر عرب اور مسلم ممالک نے اسرائیلی وزیر اعظم کی تقریر کا بائیکاٹ کرنے کا فیصلہ کیا ہے۔

رپورٹ میں کہا گیا تھا کہ اسرائیلی وزیراعظم کی تقریر کے دوران مسلم ممالک کے مندوب اسمبلی ہال سے اٹھ کر چلے جائیں گے۔

واضح رہے کہ نیتن یاہو نے حال ہی میں ’’گریٹر اسرائیل‘‘ منصوبے کا ذکر کیا تھا جسے مسلم ممالک کے رہنماؤں نے عرب دنیا کی سلامتی اور خطے کے استحکام کے لیے سنگین خطرہ قرار دیا تھا۔

آج ہونے والے اجلاس کے پہلے سیشن میں اسرائیلی وزیراعظم کی تقریر کے فوراً بعد یعنی دوسرے اسپیکر وزیراعظم شہبازشریف ہیں اور وزیراعظم پاکستان کی تقریر کے موقع پر تمام مسلم،عرب رہنما واپس جنرل اسمبلی آئیں گے۔

آج تقریر کرنے والے تیسرے رہنما چین وزیراعظم لی چیانگ ہیں اور یہ بات یقینی ہے کہ ان کی تقریر سننے کے لیے جنرل اسمبلی میں پاکستان سمیت مسلم اور عرب رہ نماوں کی بڑی تعداد موجود ہوگی۔

بنگلادیش کے چیف ایڈوائزر محمد یونس کا خطاب بھی آج ہی ہوگا۔